KUCHING: Penerang Sekretari Parti Tindakan Demokratik (DAP) Sarawak Senator Alan Ling ti ngambu projek ngaga begunan tambah Sepital Miri diperambu rambau Perintah Pakatan Harapan (PH) endang penemu bula enggau enda betul, ku Menteri Kereja Raya Datuk Seri Fadillah Yusof.
Ku iya, kebuah pia laban projek nya udah dikemendarka Unit Perambu Ekonomi, Opis Menteri Besai (UPE JPM) ba baruh Perambu Ulih Ubah Keterubah dalam Langgur Pemansang Malaysia Lumpar Ke-11 (RMK-11) taun 2016.
Ku iya, projek nya udah diterima rasmi kena 28 March 2016 nengah Pom Ngepun Pejalai Projek (BPPP) ari Opis Pengerai Malaysia (KKM).
“Opis Kereja Raya (JKR) Malaysia udah nyerahka Surat Setuju Terima ngagai kunteriktor kena 11 Jun 2020 iya nya lebuh jeman perintah diatu kelimpah hari bulan nyerah tapak ngagai kunteriktor kena 25 Jun,” ku iya dalam penerang media, kemari.
Fadillah nandu, penerang Alan Ling ti madahka PH ulih ngelimatka RM50 juta ungkup projek nya nunjukka iya enda nemu bida entara siling projek enggau ungkus kontrak.
Ku iya, hari bulan ngempu tapak projek Sepital Miri endang kena 25 Jun, ke alai maya nya bedau bisi kontrak digaga entara perintah enggau konteriktor.
Iya madahka proses tender baru ti dipejalai nya siti proses biasa dikena nentuka semua atur ti dipejalai dititihka.
“Siling projek nya endang RM340 juta lalu ungkus kontrak RM289.2 juta.
“Endang ungkus siling enggau ungkus kontrak deka bebida, ungkus siling tu agih ti diberi lalu ungkus projek tu rega kontrak ti diberi perintah ngagai kunteriktor,” ku iya.
Bekaul projek ngaga Sepital Lawas, Fadillah madahka pekara nya udah dikemendarka UPE JPM ba baruh Rolling Plan 4, RMK-11 taun 2011.
Ku iya, projek nya udah diterima rasmi kena 29 Julai 2011 nengah BPPP ari Opis Menteri Pengerai Malaysia.
“UPE JPM udah netapka Value Management (VM) digaga baru kena 20 Januari 2015 lalu JKR Malaysia udah nyerahka Surat Setuju Terima ngagai kunteriktor kena 30 April 2020.
“Rega kontrak bagi projek tu iya nya RM165 juta. Hari bulan ngempu tapak diberi kena 30 Jun ngagai kunteriktor lalu hari bulan tembu ditetapka kena 26 Disember 2023,” ku iya.
