Projek sistem sapat bah, parit di Batu Kawa disadang tembu dalam timpuh tiga taun

KUCHING: Projek ngemanah sistem sapat bah enggau sistem parit ba Batu Kawa benung dipejalai enggau disadang tembu ba timpuh tiga taun.
Menteri Kaunsil Kandang Menua enggau Pengawa Berumah, Datuk Seri Dr Sim Kui Hian madahka projek ngemanah sistem sapat bah ngena agih belanja RM120 juta nya diatu udah berengkah dipejalai ba lima lorong kenyau ari taun nyin tadi.
“Projek tu dipejalai ba semua sitak Batu Kawa kelebih agi kami deka nukar ngagai parit semin.
“Pekara tu beguna amat laban kami deka mutarka penusah bah ba kandang menua tu enggau nentuka ai nadai ngandang dalam parit,” terang iya.
Iya mansutka jaku nya lebuh dirandau pemberita pengudah nyempulang Kepala Menteri Datuk Patinggi Abang Johari Tun Openg ngabas Palan Ngenduh (PPS) Dewan Kampung Sinar Budi Baru, ditu ensanus.
Ku iya, mayuh projek tejanggal ketegal Atur Mindah Betagang (PKP) dipejalai taun nyin tadi nyengkaum projek sapat bah ti udah dikemendar dalam Langgur Pemansang Malaysia Lumpar Ke-12 (RMK-12) ngaul tender tebuka.
“Taja pia, penusah bah ke nyadi ba Batu Kawa tu ukai ketegal pekara nya laban nya ukai semina Batu Kawa aja dituntung penusah bah tang nyauka semua kandang menua.
“Baka ti udah dipadah Kepala Menteri tadi, penusah bah tu nyadi ketegal ujan bangat enggau ai pasang raya seretai nyadi ,” terang iya.
Nangkan nya, Kui Hian ti mega Adun Batu Kawa madahka penusah bah ti nyadi pun taun tu entara penusah bah pemadu balat kala nyadi kelebih agi di Kuching.
Kelimpah ari nya ku iya, sekeda endur ke enda kala bah mega napi penusah bah ketegal ai pasang raya ditambah enggau ujan bangat.

Suara Sarawak