Projek SK Sebemban Spaoh lama udah tejanggal

KUCHING: Projek ‘gentian penuh’ SK Sebemban Spaoh patut dikerumban, ku Adun Saribas-PBB, Mohammad Razi Sitam.

Kenu ku Razi, nitihka pematut projek nya berengkah dipejalai dalam taun 2018 lalu enda patut ditangguh tauka dikinsil.

“Projek tu patut dirumban laban penusah tanah tusur di tebing sungai majak balat nyadi sereta ngeruga pengelikun raban di sekula nya.

“Kitai beratka pengelikun bala nembiak enggau pengajar sereta bala staf sekula ke bukai,” ku iya lebuh mantaika jurai basa nimbal jaku TYT Sarawak Tun Abdul Taib Mahmud rambau pengawa bejadika Aum Dun Ke-18 Renggat Keempat ditu, kemari.

Ku Razi, iya bisi dipadah sebedau tu ke alai projek deka berengkah dipejalai dalam bulan Mac taun tang nyentuk sehari tu nadai meda projek nya dikemansang.

Mohammad Razi Sitam

Penanggul nadai dibekal kuasa karan di Kampung Sebemban mega ku Razi suah udah dibantaika iya ba Aum Dun.

“Bisi 30 iku peranak napi penanggul tu pengudah peranak bukai ke ngempu tanah nagang tanah sida direnchah tiang api.

“Nya kebuah aku minta raban bekaul bela berundingka pekara tu nentuka servis kuasa karan ulih disambung lalu penanggul tu teputar,” ku iya nambah.

Perambu ngaga baru ban sepanjai sungai berengkah ari Kampung Balingan ngagai Kampung Sebemabn, Kampung Tanjung Assam enggau Kampung Buda.

Ku iya, tu dikena mutarka penanggul ditapi bala pekebun sebanaka kebun tama ai masin lalu ngerusak utai tanam sida.