BAU: Projek masang 285 iti lampu solar sepemanjai Jalai Bau-Batu Kitang nya ‘perais’ perintah ungkup rayat ba pelilih tu.

Menteri Muda Perengka Pengangkut, Datuk Henry Harry Jinep madah, projek tu dipejalai laban betatika pengelikun rayat enggau penguna jalai alun.

Terang iya, nitihka ripot enggau data ari Indu Opis Polis Pelilih (IPD) Bau, kes bebadi nyawa ba jalai alun ke nyadi sepemanjai taun 2015 ngagai 2020 nya 2,014 kes.

“Ari penyampau, 68 kes pemati, 104 kes balat bakal enggau ke bukai nya bakal aja tauka nadai diripot.

“Nya kebuah, perintah keran ngiga chara bukai lebuh nyendiaka lampu jalai baka masang lampu solar sepemanjai jalai nya,” ku iya.

Henry mansutka jaku nya di aum pemberita pengudah ngabas Sekula Primari (SK) Segong, kemari.

Ku Henry ke mega Adun Tasik Biru, pengawa masang lampu solar nya udah dikemendar Kepala Menteri Datuk Patinggi Tan Sri Abang Johari Tun Openg ngena agih belanja penyampau urung RM2 juta.

“Nya alai, bala penguna jalai alun likun enggau lantang agi bejalai laban mayuh berundang nurun kereja ari mengeri ngagai genturung pendiau sida.

“Kitai begunaka lampu ba endur ke petang, tiku jalai, jalai begelumbang ketegal kuari enggau ke bukai,” ku iya.

Lebuh ditanya pasal pengawa milih masang lampu solar, Henry madahka nya chara pemadu jampat enggau mudah seraya nganti jalai alun empat arung digaga ba jalai nya.

“Enti kitai ngepunka pengawa jalai alun, lampu solar tu ulih dipindah lalu jalai agi terang.

“Tang enti kitai ngena lampu elektrik, nya enda ulih dipindah ngujungka jalai nya petang.

“Nya kebuah, Opis Kereja Raya (JKR) ngasuh kami ngena lampu solar tu,” terang Henry.

Nambahka nya, iya ngarapka projek masang lampu solar ba sepemanjai jalai tu deka tembu sebedau Pengerami Gawai Dayak tu ila.