Projek Waterfront Selangau tembu June

SELANGAU: Projek Waterfront Selangau diatu lanchar dipejalai, ku Ir Christopher Gira Sambang.
Adun Tamin nya madahka tu entara projek rayat sitak Dun Tamin ke benung dipejalai.

Gira mega madahka Projek Waterfront Selangau nya beungkus RM5 juta.

“Projek nya diatu udah tembu 67 peratus enggau disadang tembu penuh bulan June tu.

“Pia mega, projek tu dipejalai di baruh Majlis Daerah Luar Bandar Sibu (MDLBS) enggau dipatau konsultan,” ku iya nerang, Hari Tiga tu tadi.

Beduduk ari nya, Gira meri besai terima kasih ngagai Perintah Gempung Parti Sarawak (GPS) laban udah ngemendarka agih belanja dikena bejalaika Projek Waterfront Selangau.

Iya mega madahka perengkaguna baru tu deka ngubah pemansang ba Pasar Selangau.

“Sebedau tu, projek nya tejanggal ketegal Atur Mindah Betagang (PKP) diterit dikena nagang pengerekai igi penyakit Covid-19.

“Taja pia, diatu projek nya udah dipejalai baru enggau disadang tembu tengan taun tu,” ku Gira nerang.

Gira madahka penembu projek nya deka nyapai juluk rayat ba Pelilih Selangau ti lama deka ngembuan waterfront.

“Waterfront tu ba Batang Mukah deka nyendiaka palan ngelantang ati ngagai peranak ba pelilih nya,” terang iya.

Iya mega madahka Projek Waterfront Selangau dirintai entara projek dikemendar Kepala Menteri Datuk Patinggi Abang Johari Tun Openg ngagai Selangau dalam taun 2018.

Ku iya, Projek Waterfront Selangau ukai semina ngubah rampa pasar nya tang deka nyadi palan pematak baru.  

Perengka guna baru tu deka ngubah rampa pemansang ba Pasar Selangau.

Suara Sarawak