Proklamasi Darurat ukai dikena ngetanka kuasa

KUCHING: Proklamasi Darurat diatur ngambika Perintah Besai ulih ngeletakka ordinan engkeman enggau lengkas dalam nagang pengerekai penyakit Covid-19.

Menteri Orang Dagang Dalam Menua enggau Pekara Penguna (KPDNHEP) Datuk Seri Alexander Nanta Linggi madahka sekeda penemu ti madahka Proklamasi Darurat tu nguntungka sekeda raban enda betul.

“Tu ukai ungkup tuju politik tauka ngetanka kuasa, tang ungkup mutarka penanggul bukai iya nya pengerekai penyakit Covid-19.

“Bisi pekara ti mar diputarka dikena nyelamatka rayat, nya kebuah darurat tu dipejalai,” ku iya.

Nanta bejaku munyi nya ba aum pemberita pengudah Program Malaysia Prihatin di sebuah hotel ditu, kemari.

Ku iya, pekara tu nyemetak dipeda lebuh perintah minta kerejasama ari institusyen pengerai peribit.

“Nyema kitai minta volunteer sida enggai, tang fasiliti pengerai perintah udah enda chukup.

“Nya alai, nengah darurat kitai ulih mesul sida ngambi bagi nyaup perintah mutarka penanggul ti benung ditapi tu,” ku iya.

Pia mega, Nanta madahka ungkup tuju ti sama mega, mayuh kluster Covid-19 ti ngerekai datai ari kilang enggau palan kunterik.

“Kes berampit nyadi ukai ba palan gawa, tang ba palan diau ti disediaka pengaji.

“Palan diau ti disediaka pengaji mit, sekut sereta kamah ngujungka penyakit tu balat ngerekai.

“Lebuh kitai minta pengaji ngemanahka palan diau pengereja, sida nadai meri timbal ti manah, nya kebuah kitai ngena ordinan baru nengah darurat,” ku iya.

Tandu iya, pengudah ordinan tu dipejalaika kes positif ari kilang enggau palan kunterik bisi nurun.

Berebak enggau nya, iya madahka darurat mega dipejalaika ungkup tuju nagang berita bula kelebih agi berita ti ngamahka nama perintah.

“Perintah benung mutarka isu Covid-19, nya alai kitai enggai meda berita bula diguna sepeneka ati.

“Ambika chunto diatu kitai benung ba Program Imunisasyen Nasional, kitai enggai pansut berita bula ti semina deka ngamahka nama perintah,” ku iya.

Iya ngarapka semua rayat ngambi bagi enggau program vaksin laban program nya ulih nyamin pengerai rayat sereta ngerembaika ekonomi menua udah tu ila.

Suara Sarawak