PRS udah sedia napi PRN

SERIAN: Nyema Pengawa Bepilih Nengeri (PRN) dipadah diatur pagila, kami (PRS) endang udah sedia, pia ku jaku Ketuai Nembiak iya, Datuk Snowdan Lawan.

Ku iya, semua sida udah sedia sekalika raban Indu enggau Nembiak PRS ngelaban maya PRN ke deka dipadah sebarang maya.

“Pekara ke beguna amat diatu iya nya penyerakup entara rayat Sarawak lebuh negika hak sida.

“Semua parti kelimpah ari Gempung Parti Sarawak (GPS) nya sigi disatup kitai magang sekalika sida ngumbai diri parti ari menua tu,” ku iya.

Snowdan mansutka jaku nya ba Pengerami Makai Lemai Solidariti PRS Balai Ringin di Dewan Chung Hua ditu, malam tadi.

Nambahka nya, iya ti mega Adun Balai Ringin madahka polisi Kepala Menteri Datuk Patinggi Abang Johari Tun Openg terang bendar negika hak Sarawak kelebih agi lebuh bejadika Program Sarawakku Sayang pun bulan tu tadi.

“Ba sitak Balai Ringin, Kepala Menteri mantaika agih belanja RM10 juta dikena ngaga stadium mini enggau numbuhka opis pelilih ti baru.

“Pia mega, agih belanja penyampau RM256 juta udah dikemendar dikena ngaga jalai belakin ngagai Kampung Tuba, Mentu, Muding enggau Sungai Indai seraya RM106 juta mega dikena ngaga jalai belakin ba Batang Skrang, Keranggas enggau ke bukai,” terang iya pasal agih belanja nya.

Snowdan mega madah, belanja penyampau RM25 juta deka dikena ngaga jalai ngagai sitak Melikin seraya RM50 juta agi ngaga jalai ngagai Kampung Menangkin nyentuk Keranji.

“Semua projek tu dipejalai chara berenggat dalam kandang lima taun lalu projek tu ngayanka pengeran kami ngemansangka sitak Balai Ringin.

“Kitai meseti beserakup ngambi nyeliahka pekara ke enda manah nyadi ba Sarawak,” ku iya nyemetak madah.

Suara Sarawak