KUCHING: Komiti Besai Pengawa Bepilih (SPR) netapka 19 November tu hari ngundi ungkup Pengawa Bepilih Besai Ke-15 (PRU-15).
Pekara nya dipadahka Chairman SPR, Tan Sri Abdul Ghani Salleh ba aum pemberita tadi, pengudah aum khas ba Indu Opis SPR nentuka haribulan bepilih.
Nambahka nya ku iya, haribulan nganjung nama chalun ditetapka kena 5 November tu seraya hari ngundi tumu diatur kena 15 November tu.
“Timpuh bekimpin ditetapka pengelama 14 hari pengudah ngenukuka chalun ti bediri minta pilih kena 5 November tu (Hari Enam) nyentuk pukul 11.59 malam, 18 November tu (Hari Lima),” ku iya.
Abdul Ghani madah, atur peminta semua kategori undi opis menua luar enggau dalam menua udah dibuka berengkah ari 10 Oktober tu tadi ungkup PRU-15.
Ku iya, peminta undi pos ungkup kategori 1B (peranak Malaysia ke diau ba menua luar) enggau Kategori 1C (Ejensi / Organisasyen) dipejalai nengah online.
Iya madah baru, bisi 222 Palan Nganjung Nama Chalun (PPC) enggau 222 Palan Ngumpul Undi (PPRU) deka dikena.
