KUCHING: Parti Pesaka Bumiputera Bersatu (PBB) deka numbuhka sebuah komiti dikena napi Pengawa Bepilih Besai (PRU) ti dipelabaka deka diatur sebarang maya.
Chairman Gempung Parti Sarawak (GPS) Datuk Patinggi Tan Sri Abang Johari Tun Openg madahka, komiti nya diuluka Sapit Presiden PBB Datuk Amar Douglas Uggah Embas enggau sekeda raban tuai bukai.
“PBB seruran besedia napi pengawa bepilih enggau bala bakih dalam komponen GPS ke alai kami deka nyikap komiti dikena napi pengawa nya.
“Tu PRU keterubah ngagai GPS laban sebedau tu, kitai bepekit nguna tiket Barisan Nasional (BN),” ku iya.
Abang Johari bejaku munyi nya pengudah Aum Supreme Kaunsil PBB di Indu Opis PBB ditu, kemari.
Nangkan nya, iya nyemetak madahka GPS deka ngengkah semua 31 iku chalun bepekit ngerebut penuduk parlimen PRU tu ila.
Dalam pekara bukai, Abang Johari ke mega Presiden PBB madahka bisi sekeda Kaban Parlimen udah madahka diri enda bepekit baru dalam PRU tu ila.
“Bisi sekeda Kaban Parlimen (MP) PBB mantaika buah runding deka nyurutka diri enggau deka meri awak ngagai chalun biak.
“Aku meri terima kasih ngagai sida, tu meh budaya dalam PBB lebuh sida ngasaika udah chukup maya endur meri peluang ngagai raban biak,” ku iya.
Taja pia, Abang Johari bedau madahka nama enggau berapa iku Kaban Parlimen PBB ti deka nyurutka diri nya.
PBB ngembuan 13 iku Kaban Parlimen iya nya Datuk Sri Wan Junaidi Tuanku Jaafar (Santubong), Datuk Seri Fadillah Yusof (Petra Jaya), Datuk Rubiah Wang (Kota Samarahan), Datuk Seri Nancy Shukri (Batang Sadong), Datuk Rohani Abdul Karim (Batang Lupar), Datuk Robert Lawson Chuat (Betong), Yusuf Abdul Wahab (Tanjung Manis), Ahmad Johnie Zawawi (Igan), Datuk Hanifah Hajar Taib (Mukah), Datuk Sri Alexander Nanta Linggi (Kapit), Lukanisman Awang Sauni (Sibuti), Datuk Hasbi Habibollah (Limbang) enggau Datuk Henry Sum Agong (Lawas).
