PSB majak disukung rayat

“Di Engkilili, pengundi baru enggau lama majak mandangka sukung ngagai PSB.”

ENGKILILI: Parti Sarawak Bersatu (PSB) majak nerima sukung tegap ari rayat iya nya lebih 2,000 peminta nyadi kaban baru diterima ari sekeda Palan Ngundi (PDM) Engkilili.

Pengawa nyuaka pom dikenataika empat pengari iya nya Tuai Rumah Pindi Gerang, Tuai Rumah Usop Mit, Kapitan Bong Fong Boon enggau Empenit Sirai.

Pia mega, pom tu udah disuaka Kaban Kaunsil Nengeri (Adun) Engkilili Dr Johnical Rayong Ngipa ba mua lebih 100 Tuai Rumah enggau exco baru PSB Engkilili di Dewan Dr Johnical Rayong Ngipa, ditu kemari.

Raban ke baru nyereta parti PSB tu ngujungka kaban ti nyereta PSB Dun Engkilili diatu manggai 6,000 orang.

PARTI PUPU BANSA… Rayong begambar enggau bala pengari sereta ketuai komuniti pengudah Pengawa Nyuaka Pom nyadi kaban baru PSB ba Dewan Dr Johnical Rayong Ngipa, ditu kemari.

Tuai Rumah Pindi ari Empelam madahka rayat Sarawak nyengkaum ba Dun Engkilili majak nerima penatai PSB ba menua tu.

“Di Engkilili, pengundi baru enggau lama majak mandangka sukung ngagai PSB,” terang iya.

“Ba penemu kami, tuju PSB terang bendar negika agenda rayat Sarawak ukai semina nyadi sebuah parti pupu bansa,” ku Pindi.

Kapitan Bong ti ngarika raban bansa China ba Engkilili mega sepenemu enggau Pindi lalu madahka rayat diatu udah mereti sereta pintar bepolitik.

“Pengundi ukai baka suba ke semina nitihka jaku perintah laban kami milih chalun enggau parti ti ngarika rayat lalu ukai nithka sapa ke megai perintah tu,” ku Bong.

“Jaku madah, sapa ke enda nyukung perintah enda nerima pemansang tu semina chara lama lalu penemu politik aja,” ku iya seraya madah pengawa ngagihka pemansang ungkup rayat endang tanggungpengawa perintah.

Berindik ari nya ku iya, sida beratika kualiti pengidup rayat nadai bida sekalika dipegai Perintah Sarawak tauka Perintah Besai, nya kebuah PSB tu parti pemadu manah negika hak rayat Sarawak.

Berebak enggau nya, Rayong udah nyuaka geran Projek Mit Pemansang Menua Pesisir (MRP) ngagai 23 buah kaban Komiti Pemansang enggau Pengelikun Genturung Pendiau (JKKK) ari Palan Ngundi (PDM) Pentik beungkus RM150,000.

Kenu ku Rayong, pengawa nyuaka geran tu ngayanka PSB enggau naka ulih mantu rayat Sarawak taja enda begulai enggau Perintah Sarawak.

Nya alai, iya dekaka pengundi berani nukar perintah begulai enggau PSB pengudah ngasaika polisi ke diatu nadai meri empas ke manah ngagai sida.

“Anang takut berubah enggau ngasaika penuduk diatu udah entap berindik ari ubah politik kelebih agi lebuh kitai bela nemu pemutus Pengawa Bepilih Mit (PRK) Tanjung Piai apin lama, ke alai chalun penyakal menang besai undi majoriti iya nya 15,086,” ku Rayong nyemetak madah.

“Arap kitai berubah nitihka PSB ke nyadi sebuah parti menua tu empu,” ku iya.