Sekumbang udah betukar nama baru, parti lebih fokus ngagai pemansang komuniti di menua pesisir

KUCHING: Pengawa numbuhka pampang parti PSB di selampur sitak Dun dikeandal ulih mantu ngenegapka pengawa Perintah Sarawak ti bebendar ngubah pengidup rayat lebih agi ba sitak menua pesisir.

Presiden PSB Datuk Sri Wong Soon Koh nyemetak madah, sekumbang parti nya diberi nama baru ari UPP ngagai PSB, parti lebih fokus ngagai pemansang komuniti di menua pesisir.

Ku iya, PSB dikemendarka Opis Pengerejista Gerempung (ROS) pengudah ke diberi nama baru lalu udah mega dipenyadika Kepala Menteri Datuk Patinggi Abang Johari Tun Openg kena bulan Disemberr taun nyin kemari.

“Pengudah kitai (parti) dipenyadi, PSB terus ngaga roadshow lalu betemu enggau rayat ba semua pampang. Dini-dini endur pengerami diatur PSB dia aku meda sukung ari rayat chukup manah, beribu iku orang datai.

ADAT … Datuk Sri Wong Soon Koh begulai enggau bala ketuai PSB bejalaika pengawa miring rambau Pengerami Mantar Gawai PSB 2019 di Kuching, ensana.

“Nya alai, sekalika UPP tauka PSB, parti kitai tetap sama nadai bida iya nya kitai sebuah parti pupu bansa lalu kitai meri servis ngagai semua rayat,” ku iya rambau Pengerami Mantar Gawai PSB 2019 diatur Raban Nembiak enggau Indu PSB di Crown Square ditu, ensana.

Soon Koh ke mega Menteri Wang Kedua madah, nyema sebedau tu UPP lebih fokus ngagai sitak mengeri tang diatu PBS lebih besai agi bungkur fokus ngagai menua pesisir.

Kenu ku iya, PSB deka bekerejasama enggau Perintah Sarawak lebih agi dalam ngemansangka projek menua pesisir ngambika status pengidup rayat manah agi.

“Endang diaku, amat bisi parti bukai bela gawa ba mayuh sitak tang ba penemu aku, nya ukai penanggul endur PSB numbuhka pampang ba sesebengkah sitak.

“Tuju kitai numbuhka pampng ba sesebengkah sitak awakka ulih gawa ke rayat kelimpah bela nyaup pangan diri,” ku iya.

Soon Koh mega madah, iya udah ngasuh 26 pampang ke bisi ba serata Sarawak lebih agi kandang mengeri ngambi mayu agi kaban, awakka sida sebaka enggau penyampau kaban parti ke bisi ba menua pesisir.

Sebedau tu, pengawa nukar nama parti UPP ngagai PSB udah disetuju nengah Aum Besai Delegit (EDC) parti kena 8 Disember 2018, ti dipenyadika kepala menteri.

Udah nya, kena 22 Februari taun tu, ROS ngemendarka peminta parti ti deka nukar nama UPP ngagai PSB sereta nguna lambang baru. Naka tu, PSB ngembuan 26 pampang lalu bisi 38,000 iku kaban ba selampur Sarawak.

Suara Sarawak