PSB ulih menang mayuh penuduk

KUCHING: Parti Sarawak Bersatu (PSB) sedia bediri ba semua 82 penuduk tauka abis nadai 50 penuduk maya Pengawa Bepilih Nengeri Ke-12 (PRN12) ke deka datai.

Presiden iya, Dato Sri Wong Soon Koh madah, kebuah pia laban PSB tu sebuah parti besai ke ngatika diri enggau ulih nentuka ba dini deka bediri ba sebarang penuduk.

Iya mega madahka PSB enda baka Gempung Parti Sarawak (GPS) tauka Pakatan Harapan (PH) ti meseti bebagi kerusi.

“Aku udah ningkilka diri ari nyereta Kabinet Sarawak enggau diatu PSB nyadi sebuah parti ngatika diri.

“Maya PRN12 ila, PSB deka bediri ba sebarang sitak ke dikeandal kitai ulih menang.

“Kitai ulih bediri ba 50, 60 tauka semua 82 penuduk Kunsil Nengeri (DUN) Sarawak lalu kitai deka ngemata tambai PSB dikitau ba selampur menua enggau menua pesisir,” terang iya.

Iya mansutka jaku nya ba Pengerami Makai Lemai ngintu Taun Chit ( Taun Baru China) PSB di KTS Garden ditu, malam tadi.

Sama datai Penyanding Penemu PSB Dr Chou Chii Ming, Sekretari Besai PSB George Lo enggau ADUN Engkilili ti mega Ketuai Nembiak PSB Dr Johnical Rayong Ngipa.

Ungkup penemu ba pengawa bejadika pampang PSB sebedau dia sekeda nama chalun ungkup PRN udah dibantai mungkur sitak Dun Balai Ringin deka diarika Kaban Parlimen Sri Aman Datuk Masir Kujat, Dun Opar Datuk Ranum Mina enggau Dun Tasik Biru Datuk Dr Tiki Lafe.