Pujur pekara ti patut ngulihka Hak Ngempu Strata, ku Sim

KUCHING: Mensia mayuh ke ngembuan reta ba nengeri dipinta ngaduka Hak Ngempu Strata sida ba Housing Development Corporation (HDC) pengudah sida mayar abis jali rumah enggau bayar ngatur pengawa.

Menteri Kaunsil Kandang Menua enggau Pengawa Berumah Datuk Dr Sim Kui Hian madah sida ke udah abis mayar pinjau sereta bayar ngatur pekara rumah, sida patut ngaduka Hak Ngempu Strata nya.

“Abis nadai, pengudah sida bisi hak tu, sida ulih bejalaika sebarang pengawa nitihka peneka diri ba rumah nya.

“Tang, sebedau sida bulih hak tu, sida patut mayar abis dulu semua pinjau enggau atur pengawa bekaul jali bank sida,” ku iya.

Sim mansutka jaku tu lebuh nyuaka Surat Hak Ngempu Strata Flat ba genturung pendiau Sepakat Jaya, tadi.

HAK KITA… Sim nyua surat Hak Ngempu Strata ngagai siku peranak ke diau ba genturung pendiau Sepakat Jaya, tadi.

Sim mega madahka Kepala Menteri, Datuk Patinggi Abang Johari meri geran RM11 juta dikena mantu ngaga sukat kelingi 15,000 lebih unit rumah ke patut diberi hak ngempu.

“Genturung pendiau tu lot keterubah nerima Hak Ngempu Strata, lalu 800 unit ke bukai deka diberi udah tu.

“Ditu aja bisi urung 640 unit nerima Hak Ngempu Strata,” ku iya.

Udah 20 taun sida nganti, mayar semua jali bank enggau bayar bukai, diatu sida udah bulih hak ngempu rumah, ku Sim nambah.

Sama datai Kaban Kaunsil Bako, Dr Hazlan Abang Hipni, Chairman HDC Datuk Abang Rauf Abang Zen sereta pengari ari opis perintah ke bukai.