Pukul 5 pagi, udah nganti ba mua BSN

MUKAH: Kenyau ari pukul 5 pagi kemari, udah bisi peranak ngelingi Bagi Menua Mukah bebaris panjai nganti gintir diri ngambi duit Bantu Prihatin Nasional (BPN) enggau Bantu Khas Sarawakku Sayang (BKSS) ba Bank Simpanan Nasional (BSN) Pampang Mukah.

Lebuh pemberita Suara Sarawak ngabas endur nya pagi kemari, mayuh penguna ngagai Mukah lalu sida tu datai ari sitak 60 ngagi 80 kilometer penyauh ari Pasar Mukah baka datai ari rumah panjai Lubok Bemban, Nanga Sikat, Ulu Sikat, Kenyana enggau endur bukai nyentuk Selangau laban Selangau nadai BSN.

Pukul 8 pagi, begunan BSN ba tengah Pasar Lama Mukah meda mensia mayuh udah bebaris nyentuk penyauh lebih ari 200 meter sebedau ngaduka pengawa sida ngagai piak BSN ba kaunter bank nya.

Nitihka penerang ari mensia mayuh, bisi entara sida udah ngelawa BSN nya kedua kali pengudah puntan tauka bank nadai beoperasyen agi pukul 2 lemai Hari Enam tu tadi enggau datai baru bebaris ngambi ngeluarka duit BPN enggau BKSS sida.

Taja mayuh orang bebaris ba sepiak pintu Bank, tang mensia mayuh mengkang nyaga takah enggau pangan diri seraya nganti gintir diri.

Ketuai Polis Pelilih Mukah DSP Jimmy Panyau lebuh nerang pasal orang ke bebaris opanjai ba BSN Mukah kemari madah, iya udah ngasuh bala pemesai polis matau mensia mayuh ba BSN nya enggau nentuka sida nyaga takah enggau pangan diri.

Kelimpah ari kaban polis, piak Rela mega diasuh gawa ngambi matau mensia mayuh ba bank nya.

Berebak enggau nya, Jimmy ngarapka mensia mayuh anang irauka utai ke nyadi laban nya endang suah nyadi laban bisi siti aja pampang BSN ba Mukah enggau Mukah suah ditapatka mensia mayuh nyentuk ari Selangau, Kuala Balingian enggau Nanga Baoh.

BSN beoperasyen naka pukul 2 lemai aja tang kita ulih datai ila lusa lebuh deka ngambi duit.