BALEH: Chalun Parti Tindakan Demokratik (DAP) Baleh, Kenneth Usang George Lagong ngelalau rayat Baleh sama bela berunding enggau manah lebuh nentuka kuing tuju menua ba Pengawa Bepilih Besai Nengeri (PRN-12) tu ila.

Menua Baleh ngembuan tanah kampung ti besai manah bendar enti dikemansangka nyadi palan betanam betupi, pia mega ngembuan rampa menua ti chukup manah nyadika palan dagang temuai.

Ku Kenneth, dua perkaranya deka dikemansangka iya nyema dipilih nyadi pengari rayat Baleh.

Udah nya Kenneth madahka penanggul jalai nuju ke rumah panjai dipelilih menua Baleh mega siti ari penanggul ti enda nemu teputar.

“Bisi 70 peratus ari jalai ba menua kami ditu nengah jalai batang ke digaga kompeni batang,” ku Kenneth.

“Baka ni enti kompeni batang nya ila udah nadai agi? Sapa deka ngaduka jalai nya? Lalu sampai kemaya deka bekunsi nengah jalai batang nya?” ku tanya iya.

Nangkan ke nya, Kenneth ngelansa pasal penanggul arus internet di Baleh.

Kenneth naka tu udah ngelawa lebih 50 buah rumah panjai ba pelilih menua Baleh betemu seraya mendingka serebana peranak menua Baleh.

Nitihka pansik Kenneth, semina urung 20 peratus aja pengundi ti bisi nguan rumah panjai jam ke diatu lalu tebal agi sida nya orang tuai ke nadai dapat agi gawa.

Udah nya, 50 peratus agi diau ba pasar Kapit ditangkan 30 peratus diau diluar menua Kapit laban nitih ka ‘periuk asi’ (bekereja) diri.

Bekau ari penusah Covid-19 tu agi balat bendar nyadi engka tau ngujungka mayuh pengundi enda ulih pulai ngundi.

Taja pia, Kenneth tetap meransang sida ke ulih mulaika diri ngundi patut pulai dikena bejalaika tanggungpengawa diri nentuka kuing tuju menua.

“Enti kita beamat-amat deka ngetanka sereta ngemansangka menua pulai mih ngundi, anang nesal dudi hari meda menua diri majak tinggal pemansang,” ku lalau iya.

Kelimpah ari Kenneth, Dun Baleh serak tu deka direbut Nicholas Kudi ari GPS, Koh Kumbong (PSB) enggau Irwan Iskandar Sukarno Abdullah (PBK).