Pungka lelaki Iban ngetanka menua

LEBUH pungka lelaki Iban mansang bedengahka pala munsuh kelia, sida nya deka digelar bujang berani menua.
Pengudah taun 1841, sekeda bala bujang berani Iban tu nyukung Rajah Putih tang bisi sekeda ngelaban penguasa baru ti megai menua kitai jeman nya.

Nyau kelama, gaya pengidup baka tu diterima komuniti Iban lalu bala bujang berani endang ransingka pengawa ngelaban munsuh laban pala munsuh dibai pulai nya kelai sida tu bisi penemu, kering enggau berani kempang.
Jeman nya mega sida ke dara deka tekait ati ngagai bala bujang berani ke kala pulai mai pala diulih sida ngayau.

Taja jeman Brooke dalam taun 50-an enggau 60-an udah nadai agi diatu, tang agi bisi orang Iban ngembuan runding deka nunda chara bedengah sereta pemujur aki ini kelia.

Bansa Iban kelia endang beberita sereta dikemegah enti mai pulai pala ulih bedengah kelai sida tu berani enggau kempang ngetanka menua lebuh menua agi siga.

BASA PEMATI

RANGKAH PALA… Bujang berani ti bedengahka pala munsuh enggau mai pala nya pulai deka dikemegah peranak rumah panjai laban siku lelaki ti berani sereta kempang.

Gawai Antu tu awak kitai ngintu adat pemati dikumbai merantu orang ke udah midang enggau tu siti adat asal Iban sereta basa besai diberi ngagai bala diri sebilik ke udah parai nyerumba lemai, udah mati nyerumba hari, udah midang nyerumba petang, udah danjan nyerumba malam enggau udah nadai lalu ninggalka kitai.

Kelimpah meri basa ngagai bala diri sebilik ti udah ninggalka dunya injau tu, Gawai Antu mega siti adat bansa Iban. Gawai tu tau dikumbai nyelai laban tu maya kitai ngangauka semengat orang ti udah midang nyau pulai ngagai menua asal, datai ari Dunya Sebayan.

Nya kebuah, bansa kitai ngena Lemambang Timang Jalung laban iya nguluka pejalai semengat orang ti udah parai nikal pulai baru ngagai menua kitai ti agi idup tu.

Tu mih basa kitai ngagai kaban belayan enggau diri sebilik ke udah nadai nya lalu suah agi rumah panjai ti rabat nya deka ngangauka rumah panjai bukai ngambi ngulu pengerami Gawai Antu tu.

AI JALUNG 

Ngenang pasal pengawa bedengah tu, menua Krian enggau Saribas suah mantaika dua pengawa Iban dikena ngintu Pengerami Gawai Antu.

Dua pengawa tu iya nya Nuntum Jalung enggau Ngirup Buluh ke alai dua pengawa tu endur ngirup ai tuak ngena jalung enggau buluh. Tuai lemambang deka belabuh nimang baru nyentuk sida nembuka timang enggau tuntung jalung.

Nyadi sida nuntungka jalung nya kira belabuh ari pukul tiga dini hari. Nyadi tu utai siti ke ngerindu bendar ati, laban nya maya orang nuntung bujang berani.

Kebuah pia laban semina orang ke udah bedengah, basah jari enggau orang ke aris aja tau ngirup jalung.
Tu meh maya lemambang lalu nanya ensumbar bala sida ke ngirup jalung nya. Ensumbar tauka gela tu mai mayuh reti ke belalai, tauka cherita lalai.

Ba raban bansa Iban, bisi ensumbar dikangau Ular Entadu Kidu-kidu Nyemerai Nanga Sungai, Siku Tembu, Siku Ditandu Orang Bukai

ENSUMBAR BUJANG BERANI

Ke bendar iya, Pengerami Gawai Antu tu mih pengerami dianti aku laban bala bujang berani deka mantaika ensumbar sida.

Bisi sekali ba rumah panjai Ulu Bayor, Saribas dalam taun 1988, siku bujang berani benama ACP (Rtd) Nicholas Rateh madahka diri nadai ensumbar.

Bisi sekeda rumah panjai agi nyimpan rangkah pala tu ba rumah sida dikena ngingatka pengawa bedengah kelia.
Lebuh agi biak kelia, aku suah ngelaungka diri ari mansa rangkah pala Gun Mangku Bumi, niang aki Datuk Amar Dunstan Endawie Enchana.

Ba endur apai aku ada di rumah panjai Munggu Embawang, Melupa di Saratok, menyadi apai aku benama Tawi Bungin suah dikangau Lanang Kasih Sayang Bedindang Madang Rutan, Tawi Berani Ati Pengemudi Iban.

Kenu ku jerita tuai, iya bulih gelar nya pengudah bedengah dua pala munsuh lebuh Perang Bantin tauka dikumbai Perang Cholera Delok (1902) ba Ulu Batang Lupar diketuai Rajah Vyner Brooke enggau FitzGibbon Deshon ke nyadi Residen Bagi Menua Kuching.

PERANG BANTIN

Ngelansa pasal Perang Bantin, laban pemerani Bantin nyau majak-semajak, dalam bulan Enam taun 1902 Rajah Charles Brooke ngasuh anak iya Rajah Muda Vyner Brooke matak bala besai kira betubuh 12, 000 iku nyerang Bantin.

Ari bala ngemayuh tu, bisi 500 iku bansa Melayu sereta lima puluh iku raban soldadu ari Sarawak Rangers ke chukup disikap ngena senyata lalu ke bukai nya bansa Dayak.

Bala pengayau betubuh bisi 12,000 iku tu tadi betatam di Nanga Delok laban deka ngaga kubu tiga buah.
Sebuah di Nanga Mepi, sebuah di Menyang lalu sebuah di Nanga Delok sebedau sida ngalahka rumah Bantin di Ulu Delok.

Lebuh angkat, enda mukai-mukai bala Rajah mati siku-siku baka ke disipat enggau kena sumpit. Nadai lama nya betegaring magang bangkai sida tu.

Meda utai nyelai baka nya, bala Rajah ke agi idup lalu ngelarika diri pulai kili laban nyau bisi berasai takut meda bala bukai udah parai tekala nya.

Kenu ku jerita, benung bala Rajah betatam di Nanga Delok, dia sida bisi meda dua iti utai chelum sereta besai baka lumpung batang lepu-lepu anyut ari ulu.

Datai ba endur bala Rajah ke betatam enggau diau di Nanga Delok, utai nya lalu nengelamka diri enggau sida melaba utai nya ular nabau.

Nampung tusi sida ke tuai, ninga rita bala Rajah deka mai tubuh ngemayuh nya mansang ngayau iya, dia Bantin tusah ati.

Iya lalu bedara, chukup enggau piring enggau ading sereta besampi enggau sabak-sabak minta tulung Petara laban ngira diri enda tetanka bala indu nembiak enti belaban enggau bala Rajah ti betubuh 12,000 iku.

Kena 16 Mei 1907 Bantin diperita mansang ke Kapit laban datai bebaik enggau Penghulu Dalam Munan.
Pengawa bebanchak jani entara Munan enggau Bantin tu dikemataka Rajah Charles Brooke empu sereta Residen Charles Hose.

Udah tembu pengawa bebanchak jani, Bantin meri Rajah siti tanda pengingat iya nya sebatang sangkuh ke beremuyam laban jejabung buk munsuh ke tanda bebaik enggau perintah.

Dalam taun 1909, Bantin pindah ngagai Lebuyan, Indonesia. Iya parai tuai ba taun 1932 lalu dilumbung peturun iya din. Kenu ku cherita tuai mega, Bantin mati nyadi ular nabau laban iya endang sigi ditulung Orang Panggau.