SIBU: Pemansang ba sitak Dun Bawang Assan ulih disungkak enti sema diarika tuai ke baru.
Penyandang dia diatu puntan bejalaika pemansang baka dikedeka taja gawa pengelama urung 25 taun nyengkaum dalam ex-kabinet perintah nengeri.
“Ambika banding, bisi sekeda endur agi bedau disikap bekal ai beresi nyentuk diatu.
“Tu mih pemedis iya,” ku Direktor Pengawa Bepilih GPS Nengeri Datuk Amar Douglas Uggah Embas lebuh betemu enggau raban GPS, ditu ensanus.
Senator Robert Lau Hui Yew ari Parti Sa’ati Rayat Sarawak (SUPP) udah dichalun maya Pengawa Bepilih Nengeri Ke-12 (PRN12) ngarika GPS di Dun Bawang Assan.
“Penyandang iya, Dato Sri Wong Soon Koh nya pengari rayat Barisan Nasional (BN) lebuh nya tang ukai BN (parti) ti puntan bejalaika pemansang. Tang iya empu, diatu iya nyadi tuai parti penyakal nengeri dalam Parti Sarawak Bersatu (PSB), ulih kini iya (Soon Koh) gawa?,” terang Uggah.
Uggah madah, pekara ke balat sinu nya pengudah semua pemansang pedis dipejalai laban Parlimen Sibu dipegai penyakal nyengkaum Bawang Assan.
“Kitai bejaku pasal infrastruktur enggau perengkaguna ke meruan agi sereta aktiviti ekonomi rama enggau pengawa betanam betupi moden ti ulih mansutka penatai pemisi.
“Nya kebuah, kitai seruran ngelalau rayat kelebih agi peranak menua pesisir ngambi nyukung perintah.
“Sida deka bulih pemaik ari agih belanja di baruh Program Transfomasyen Menua Pesisir (RTP) enggau Projek Mit Pemansang Menua Pesisir (MRP),” ku Uggah.
Uggah mega madah, enti Robert menang iya ulih nyaga semua komiti ditu enggau adil.
“Aku andalka iya deka bejalaika tanggung pengawa baka ti dikearap lalu kami deka meratika iya gawa,” ku Uggah.
Uggah mega madahka sida (GPS) udah sedia bediri maya PRN-12 ngambi ngempu penuduk nya (Bawang Assan).
“Enti semua perambu enggau strategi dipejalai enggau manah, kami mega ulih ngereja pengawa enggau manah,” tandu iya.
Lebuh bejaku, Robert berasai gaga meda kerejasama entara SUPP, PBB enggau PDP nguji ngerampas penuduk nya ungkup GPS.
