KUCHING: Perintah Besai ngagihka pemeri RM50,000 ngagai Gerempung Veteran Raban Soldadu Malaysia (PVATM) Sarawak.
Menteri Kanan Kereja Raya, Datuk Seri Fadillah Yusof madah, nya kelai meri sukung ngagai gerempung nya ke udah bejalaika tanggung pengawa kelebih agi nyaga pengelantang ex-soldadu ba menua tu.
“PVATM udah bejalaika tanggung pengawa lalu bantu nya dikena ngingatka jasa enggau pengawa ke udah dikereja sida ngagai menua tu.
“Taja penyampau tu RM50,000 engka besai dipeda tang enti dibanding enggau jasa sida ke udah berambunka nyawa nyaga pengelikun menua penyampau nya kebendar mit,” terang iya.
Nambahka nya ku iya, tim ari Opis Kereja Raya deka dianjung ngaga pansik pasal begunan besai PVATM di Kuala Lumpur.
Terang iya, pansik pasal pengawa nyeleti deka dipejalai laban begunan nya udah lama ditumbuh kenyau ari taun 1972.
“Kami deka nganjung tim JKR kin ngambi bejalaika pengawa mansik enda lama nya.
“Pia mega, kami deka ngiga chara baka ni deka mutarka penanggul ditapi sida.
Fadillah mansutka jaku nya lebuh dirandau pemberita pengudah Pengawa Bejadika Aum Besai Ninting Taun PVATM Nengeri Sarawak Ke-63 di Hotel Penview, malam ensanus.
Pengawa nyuaka Pingat Setia Sentiasa Berjuang (PSSB) mega udah dipejalai ngagai lima iku penerima iya nya Lt Kol Monday Juhid (pinchin), Elli Jalak, Vincent Tharuman Maniam, Zulkifli Ayup enggau Noki Ngujung.
Setipikit nya udah disuaka Presiden PVATM Kapten Datuk Sharuddin Omar empu.
