PVTKR ngabas Awang Raweng

SRI AMAN: Gerempung Veteran Soldadu Kor Renjer (PVTKR) mujur ngatur Program Nemuai Ngabas Bujang Berani Sarjan (Pinchin) Datuk Awang Raweng.

Chairman PVTKR Lt.Kol (Pinchin) Mohd. Melintang Abdullah madah, sama bisi datai nyereta pejalai sida tu iya nya Ex-Panglima Divisyen Satu Infantri Malaysia Leftenan Jeneral Datuk Stephen Mundaw.

Pengawa tu endang siti ari aktiviti ke seruran dipejalaika PVTKR ngelama tu, ku tandu Melintang.

“PVTKR endang seruran ngatur pejalai ngabas bala soldadu ke udah pinchin sereta sida ke bisi nama ba gerempung,”

“Kebuah pia,enti bisi penerang bekaul enggau siku-siku sida iya (soldadu pinchin) dia kitai muntang agi nyidi lalu nemu penusah enggau penanggul ditapi sida mega,”ku iya.

PEMERI ARI KAMI…Melintang (tiga kiba) nyua pemeri ari PVTKR ngagai Awang Raweng seraya dikemataka Datuk Stephen Mundaw (kiba) enggau bala bukai.

Melintang madah munyi nya lebuh dipinta meri timbal bekaul program PVTKR ngabas Sjn (Pinchin) Datuk Awang Raweng ba Taman Sri Aman kena 22 Feb tu tadi.

Nitih penerang, bantu belanja ke dibayar sekali ungkup Midul Jasa Menua (PJN) deka dibayar berenggat belabuh ari bulan March taun tu ila.

“Nya alai, minta semua bala veteran sama bela nentuka akaun bank sida iya agi idup,”

“Laban enti nyema akaun bank sida enda idup tauka aktif nya tau pulai ke penanggul sida enda ulih nerima bayar nya jemah,”

“Enggau tu mega aku nesau bala raban soldadu darat ti udah pinchin anang enda ngerejista nama diri enggau gerempung naka pengelengkas,”ku iya.

Berebak enggau pejalai nya, PVTKR bisi meri bantu RM500 dikena ngelempungka tating belanja ditapi Awang Raweng.

Ungkup penemu, Awang Raweng siku ari soldadu darat ke kala nerima midul Bujang Berani George Cross (GC) ari perintah British pengudah iya mujur nyelamatka soldadu menua nya maya menua charut di Malaya taun 1948-1960 kelia.

Ketegal pemerani berambun nyawa ngetan menua ngujungka iya diberi basa nerima pangkat Datuk ari Perintah Nengeri beserimbai enggau Pengerami Hari Pengada Tuai Pemegai Menua (TYT) Sarawak ke diatur ba Sibu kena taun nyin kemari.

Suara Sarawak