Raban artis patut bisi inisiatif napi pangka Covid-19

KUCHING: Raban artis enggau pemuzik patut ngembuan inisiatif tauka kreativiti kediri ngambika ulih beretan teguh maya napi pangka pengerekai penyakit Covid-19.

Penanyi Iban ke kala tebilang enggau lagu Flora ti mega pemain muzik sape, Jerry Kamit madahka raban artis enggau pemuzik mega bisi nerima pangka Covid-19.

“Kami kira dalam industri dagang temuai enggau artis endang bisi kena empas ketegal penyakit tu laban pengawa merindang enggau kangau belagu tejanggal.

“Taja pia, kitai mesti bisi inisiatif bukai baka ngaga kereja di studio, ngatur kerejasama enggau artis bukai baikka artis dalam menua tauka artis menua luar nyengkaum ngaga video ti ulih dipasukka ba ‘youtube’,” ku iya.

Jerry Kamit bejaku munyi nya lebuh dirandau pemberita ba Program Nasih Tanah Kompleks Lumba Balai Ringin ke dipenyadika Kepala Menteri Datuk Patinggi Abang Johari Tun Openg di Balai Ringin, apin lama.

Ngelansa pasal pengerembai pejalai seni iya empu, Jerry madahka diri nadai mayuh pengawa ulih digaga maya tu ketegal enda entu ulih keluar tauka ngaga pengawa ba luar.

“Taja pia, pekara pemadu baru ti benung digaga aku diatu iya nya aku benung ngaga sebuah klip video ti mandangka pengaya adat asal enggau rampa menua Sarawak.

“Projek tu agi dalam proses lalu aku agi ngumpul sekeda pekara bukai dikena aku ngemujurka pengawa nya.

“Klip video tu sebagi ari pengawa ngelakuka adat asal enggau rampa menua kitai di bumi Kenyalang,” ku iya.

Tandu Jerry, muzik ti dikena dalam klip video tu ngena muzik tradisional baka sape enggau keresa muzik lama ke bukai.

“Nganti awak ti engkeman baru klip video tu dikeluarka aku.

“Diatu klip video nya bedau tembu,” ku iya.

Jerry Kamit kala tebilang laban ngelakuka muzik sape kelimpah ngeluarka lagu Flora, Sayau Pemadu Sayau nyengkaum sebuah single Nuan Ku Sayau sebedau tu.

Suara Sarawak