KUCHING: Sepenyampau 1,300 iku raban bomba di serata Sarawak udah disikap napi penusah bah ti dipelaba deka berengkah bulan Oktober taun tu nyentuk bulan March taun baru.
Tuai Direktor Opis Bomba enggau Penyah Penusah Malaysia (JPBM) Datuk Sri Ts. Mohammad Hamdan Wahid madahka di Malaysia sepenyampau 11,500 iku raban bomba udah disikap napi penusah bah nya.
“Gaya hari enda tentu deka berengkah bulan Oktober taun tu nyentuk bulan March taun baru nya alai sepemanjai timpuh tu kitai mesti udah nyikap diri enggau pengabis manah.
“Kitai diatu dipelaba deka napi penusah dalam penusah, iya nya napi penusah bah lebuh menua agi napi penusah pengerekai Covid-19 nya alai mayuh pekara disikap baka Atur Pengawa Standard (SOP) mindahka, ngiga enggau ngidupka rayat,” ku iya.
Mohammad Hamdan bejaku munyi nya lebuh ditanya pemberita pengudah ngabas tikas sikap Perengka Logistik Raban Bomba enggau Penyah Penusah Napi Penusah Bah di Indu Opis JPBM ditu, kemari.
Ku iya, bisi enam buah nengeri ti dipelaba deka napi penusah bah iya nya Sarawak, Sabah, Johor, Kelantan, Terengganu enggau Pahang.
“Nyangka deka bisi nengeri bukai tang enam buah nengeri tu nyadi perati kami.
“Di Sarawak bisi tiga zon nyadi pengkalan logistik iya nya di Kuching, Sibu enggau Miri.
“Logistik tu ngenykaum perengka dikena ngangkut orang tasah bah, bot, bilun terebai enggau ke bukai,” ku iya.
Iya madahka, Sarawak ngembuan 77 palan tinggi (betebiang) enggau urung 97 jalai dipelaba deka putus sepemanjai timpuh nya ila.
“Sama meh kitai besampi ngambika bah taun tu enda baka bah taun siti tu tadi tauka sebaka taun 2014 suba.
“Pekara ti ngirauka ati kami iya nya palan bukai ti diberi fokus, tang palan bukai ti napi penusah bah balat.
“Nya alai, aku ngarapka mensia mayuh ti napi penusah tu ila sama ningaka lalau, jaku gerah enggau penerang ti ayan ba berita tauka media rama.
“Beri kerejasama ngagai kami awakka pengawa ngatur orang tasah bah ulih dipejalai enggau manah,” ku iya.
Sama bisi datai Direktor JPBM Sarawak Datuk Khiruddin Drahman enggau ke bukai.
