Raban indu dilalau bejimat mindah, nyaga pengelikun diri

KUCHING: Mensia mayuh dipinta bejimat laban kes ngeruntun suah nyadi ba palan bebelika barang enggau di pasar sereta tau mega nyadi ba sebarang alai sereta nadai ngira jam.

Nitihka perati ba kes suah nyadi, tebal agi sida ke ngeruntun tu nagit raban indu laban sida melaba orang indu tu mayuh enda sikar enggau besandikka kantung ti ngundan mata duit enggau barang berega bukai.

Ku Ina Kimlin, 56 taun, ti kala diruntun marik emas lebuh nanam sayur ba mua rumah iya empu.

“Aku nadai ngadang lebuh dua lelaki ngena motosikal datai ari belakang laban rindang besayur.

“Siku ari lelaki nya belanda lalu ngeruntun marik emas dikena aku lalu aku enda ulih ngelaban. Duku kena besayur mega nadai temu laban cheremin mata aku labuh ngujungka utai dipeda aku rapas,” ku iya nikalka kenang diri.

INA KIMLIN

Taja kes udah diripot ngagai polis, tang ku Ina, nyentuk diatu iya agi berasai kesal.

Sendi Gelanggang, 59 taun, mega kala ngasaika diri diruntun lebuh pulai kereja.

“Baka selama, urung pukul 5 lemai lebuh mulaika diri ari endur gawa, bedarat kediri, dua lelaki ngena motosikal datai nuju lalu narit kantung sandik aku.

“Aku tekenyit sereta nguji ngelaban, tang kaki salah singkang ngujungka aku labuh lalu kantung nya tebelengka,” ku iya ngelansa.

Bebida enggau Puri Ahad, 59 taun, kala meda kes ngeruntun nyadi ba mata iya empu.

SENDI GELANGGANG

“Kes ke dipeda aku, orang ke ngeruntun nya pansut ari kerita lalu ngeruntun kantung siku indu dataika utai dalam kantung nyau abis teberayan.

“Nya kebuah aku ngelalau semua kitai bela bejimat maya bekenaka kantung sandik. Enti ulih anang besandikka kantung, bela nyaga pengelikun enggau nyeliah sebarang penusah baka tu nyadi,” ku iya nangkan.

Seraya Saredah Pating, 45 taun, mega madahka diri kala meda kes orang kena runtun lebuh pulai meli barang ba kedai.

“Siku indu pulai meli barang dapur ari sebuah kedai. Iya diruntun siku lelaki ti ngaga diri sama pulai bebeli ke barang ba kedai nya.

“Kami ke meda sama tekenyit sereta begau lebuh indu nya manjung minta sah laban utai ti dibeli ya abis labuh,” ku Saredah.

Nya alai Saredah nangkan raban indu enda ngemai duit mayuh maya bebelika utai, chukup kena aja lalu kerepai disimpan teguh dalam kuchik, anang ngayan laban pekara baka tu ngasuh orang bukai nguji ngeruntun kitai.

PURI AHAD

 

SAREDAH PATING

Suara Sarawak