BEKENU: Pengudah nujah pejalai 47.3 kilometer (km) penyauh ngena Jalai Tebing Tasik Miri-Bintulu, Konvoi Kembara Sarawak Merdeka mujur datai ba Pantai Bungai, pagi tadi.
Konvoi ti betuai ke Premier Sarawak, Datuk Patinggi Tan Sri Abang Johari Tun Openg nya datai ba palan ngetu keterubah pengudah nujah pejalai 50 minit.
Pia mega, konvoi Abang Johari nya ti disempulang 268 penyereta diambat chukup richah ari komuniti dia ba sepemanjai pejalai ari Miri ngagai Bekenu dikena meri sukung ngagai tuai lumur satu Sarawak nya.
Lebuh datai ba Pantai Bungai urung pukul 10.41 pagi, Abang Johari diberi basa bejadi adat Nyiam Batis (masu kaki) enggau Berau Kuning sereta diperindang ngena Eksibisyen Sadaman ari tim Palan Aktiviti Orang Tuai (PAWE) Sibuti.
Premier Sarawak mega diberi penerang bekaul sitak dagang temuai ti manah enggau pemansang fasiliti dagang temuai dia ari Pemancha Pelilih Subis, Dr Ali Mudin.
Iya mega bela ngaul rayat dia sebedau matahka lengan begulai enggau bala temuai dipebasa nyengkaum Tuai Komuniti enggau Tuai Raban Bansa (KMKK).
Pia mega, bala temuai bela beperindang enggau eksibisyen koir ari raban nembiak Sekula Sekondari (SMK) Bekenu sereta eksibisyen nebah gendang.
Premier Sarawak sereta raban iya bela betanda begulai enggau komuniti dia rambau eksibisyen nebah gendang nya.
Sebedau nerus pejalai ngagai palan ngetu pengudah nya, Abang Johari meri bantu RM10,000 ngagai Gerempung Apai indai enggau pengajar (PIBG) SMK Bekenu ketegal bulih pemutus peresa Sijil Pelajaran Malaysia (SPM) 2022 ti ngemantup ati.
Udah nya, raban konvoi nya belepas ari Pantai Bungai urung pukul 11.55 pagi nuju ngagai palan ngetu pengudah nya baka Kampung Nyalau, Bintulu ba penyauh 76.1km.
