SELANGAU: Agih belanja RM50,000 udah diagih dikena ngatur aktiviti lumba enggau aktiviti bukai ba pelilih tu ungkup taun baru.
Adun Tamin Ir Christopher Gira Sambang madahka, agih belanja tu ulih dikena ngatur bemacham rintai aktiviti enggau ke bukai diatur ngagai raban nembiak kelebih agi ba sitak Dun Tamin.
“Aku meransang mayuh agi nembiak ba Selangau regas agi ngulu aktiviti lumba.
“Kebuah pia laban kitai dekaka nembiak ba Dun Tamin regas ngulu pengawa ke meri penguntung,” ku Gira.
Gira mansutka jaku nya ba Pengawa Nutup Pekit Sepak Takraw Piala YB Ir Chrsitopher Gira Sambang diatur ba Balai Mayuh Guna, Selangau Hari Minggu tu tadi.
Sama datai Senator Rita Insol, Sekretari Politik Kepala Menteri Edwin Banta enggau Chairman Pengatur Pekit, Stephen Banyan.
Bisi 24 tim ngelingi Selangau udah bepekit lalu pekit tu diatur pengelama dua hari.
Gira mega dekaka bala nembiak ba Pelilih tu ngatur mayuh agi aktiviti lumba nyengkaum pekit futsal enggau ke bukai.
Ku iya, rintai aktiviti lumba ti diatur tu ulih ngerapit sintal kaul bala nembiak, ukai semina ba pelilih tu tang bala nembiak ari pelilih bukai.
“Aktiviti lumba tu mega sebagi ari chara kitai ngerembaika kaul enggau bala bukai,” terang Gira.
Iya ngelalau bala nembiak seruran nyeliahka diri ari ngereja pengawa ke enda menuku kelimpah tau ngerusak pengidup sida.
Nangkanka nya, Gira meri pengaga ati ngagai tim ti udah mujur lalu pekit tu nyadika pelasar ngansah penau nembiak dalam lumba sepak takraw ngambi ulih dipekit ngagai tikas ke tinggi agi dudi hari,” tandu Gira.
