Raban OKU Sarawak mantai pengelandik di Unimas

KUCHING: Pengerami Orang Nyelai Pendiau (OKU) Sarawak deka mantaika tiga komponen besai iya nya lumba, penau ‘abilympics’ enggau penau mandangka main asal bala OKU.

Menteri Pengintu Pengelantang Pendiau, Komuniti, Indu, Ruang Bilik enggau Pemansang Anak Mit Datuk Seri Fatimah Abdullah madahka pengerami tu deka ngempuruka semua bala OKU ari selampur Sarawak ngambi bagi ba pengerami tu.

“Pengerami tu sebagi ari pengawa nyikap bala atlit OKU nengeri tu ke deka napi Lumba Malaysia (Sukma) ba Johor taun baru.

“Pia mega, entara tuju bukai pengerami tu ila iya nya dikena milih raban atlit biak ari raban OKU nengah tiga bengkah komponen ti disebut aku tadi,” ku iya.

Fatimah bejaku munyi nya ba aum pemberita Karnival OKU Sarawak ba Begunan Baitul Makmur ditu, kemari.

NERANG…Datuk Seri Fatimah Abdullah (kanan) lebuh bejaku ba aum pemberita Karnival OKU Sarawak ba Begunan Baitul Makmur ditu, tadi.

Ku iya, pengerami tu deka diatur berengkah 23 nyentuk 27 November tu, lalu Unimas dipilih nyadi palan pengatur laban perengkaguna di Unimas chukup manah ungkup bala OKU.

“Pengerami tu ukai semina meri perati penuh ngagai lumba aja tang ba dua bengkah komponen bukai iya nya ‘abilympics’ enggau penau mandangka main asal.

“Kitai ngarapka nengah tiga komponen tu sida OKU jemah ila ulih ngulihka penatai pemisi ari penau enggau peneleba sida nya,” ku iya.

Tandu Fatimah ba pekara lumba bisi 11 bengkah lumba deka diatur ba pengerami nya ila nyengkaum lumba nyemerai, belanda, angkat berat, boling, badminton, ping pong, boccia, bocce, chatur, boling padang enggau engkeramba.

“Program ‘abilympics’ bisi semilan iti baka nero, ngubah bungai, nyumai, ngaga kek, ngias kek, bejait, ngambi gambar enggau proses data.

“Lalu ba mandangkan main asal kitai bisi sida ti deka bepekit belagu, nebah perengka muzik enggau betanda,” ku iya.

Tambah iya, karnival tu ila mega manah dalam nyaga pengerai enggau ngelantang ati bala OKU ti datai.

“Ngarapka maya nya penusah besebun udah ambis ngambika kitai ulih bejalaika karnival tu enggau nadai penanggul,” ku iya.

Sama bisi datai Presiden Special Olympics Sarawak Datin Dayang Mariani Abang Zain, bala pematih OKU enggau bala bukai.

Suara Sarawak