KOTA SAMARAHAN: Perintah deka terus negapka orang indu dalam ngemansangka baru menua ti balat tebunsa ketegal Covid-19.

Kaban Parlimen Kota Samarahan Rubiah Wang madahka perintah terus ngaku pegai tanggungpengawa orang indu ti ulih mantu ngemansangka baru menua kelebih agi program penegap orang indu awakka sida puh napi penanggul maya diatu.

“Perintah terus bepegai ngagai atur negapka orang indu laban raban tu nyadi sebagi ari tulang belakang nyaup menua mansang.

“Nya ukai semina ari sukut rama, politik enggau ekonomi tang mega mungkur semua sukut pemansang menua,” ku iya.

Iya bejaku munyi nya rambau Program Ngintu Hari Orang Indu 2022 Sarawak Renggat Samarahan di Balai Mensia Mayuh Muara Tuang, ditu kemari.

Ku iya, pegai orang indu mega majak mar laban raban tu udah ulih besemekih enggau sida ke lelaki.

“Kitai ulih meda, nyau deka semua bidang ti dikaul orang lelaki mega dikaul orang indu.

“Pia mega, lebuh pandemik Covid-19 mayuh pengereja pengawa menua luar pulai ke menua asal ngujungka orang indu ngaul diri dalam bidang teknikal baka kilang, penyangkai kapal enggau ke bukai,” ku iya.

Ku iya, Covid-19 meri pangka besai ngagai ekonomi menua ngujungka bala orang indu enda sengaja gawa mantu nambahka penatai pemisi ruang bilik.

“Ketegal nya mega, kitai meda tanggungpengawa orang indu udah diaku ari perintah dalam negapka penemu enggau penau sida ba semua renggat,” ku iya.