SIBU: Bala pengkani manuk enggau jani deka diberi bantu dikena ngepunka baru aktiviti sida pengudah nerima empas ari penyakit Renga Burung enggau Tabin Jani Afrika (ASF).
Menteri Industri Pemakai, Komoditi enggau Pemansang Wilayah, Datuk Seri Dr Stephen Rundi Utom madah, ambi ke chunto, urung 95 peratus ladang jani udah dipunas ketegal pengerekai igi penyakit ASF taun nyin kemari.
“Bisi 95 peratus ladang jani udah dipunas lalu semina berapa buah ladang aja ti agi tinggal.
“Nya alai, kitai deka ngepunka baru aktiviti nengkani jani tu.
“Aku nemu bala pengkani napi penanggul besai laban sida lenyau pemansut penatai pemisi sida ketegal penyakit ASF,” ku iya.
Rundi mansutka jaku nya rambau dirandau pemberita pengudah bejadi Program Ngintu Genap Taun Ke-51 enggau Pengawa Angkat Sumpah Komiti Gerempung Pengkani Jelu Sibu (SLFA) ditu, malam kemari.
Iya madah, pengawa meri vaksin nya endang chara pemadu manah dikena nagang pengerekai penyakit nya.
Taja pia, ADUN Kemena nya madah, vaksin nya apin bisi.
“Gaya penyakit tu diatu udah berinsur stabil, nya alai, aku ngelalau raban tu ngepunka baru pengawa nengkani jelu tu.
“Diatu kitai deka ngepunka baru aktiviti nengkani jani lalu tu chara dikena kitai nangkup pengerugi sebedau tu,” ku iya nyemetak.
