Raban setinggan dipindah ke Siburan

KUCHING: Urung 20 ari 63 ruang bilik setinggan ke diau ba Pendam Serakup Dayak Sarawak Nasional (SDNU), Jalai Chawan deka dipindah ngagai palan baru.

Sapit Kepala Menteri Datuk Amar Douglas Uggah Embas madahka taja pia, Perintah Sarawak agi beratika taba ke engkeman alai sida mindah.

“Kepala Menteri Datuk Patinggi Abang Johari Tun Openg ngemendarka sida tu mindah ngagai siti palan di Batu Gong, pelilih Siburan ditu.

“Kami mega benung beratika endur bukai alai sida ulih berumah enggau ungkus ti mit,” ku iya.

Uggah madah munyi nya lebuh nerima pengawa nemuai meri basa ari tiga tuai rumah panjai Iban enggau raban komiti JKKK ba opis iya ditu, tadi.

Penemuai nya diketuaika Tuai Rumah Adi Jaya, Tuai Rumah Ajun Lasu enggau Tuai Rumah Moses Iba Dagang ari Taman Malihah enggau Taman Alamanda.

Tuju penemuai nya mega laban deka minta Uggah nyadi temuai ke dipebasa ba dua pengerami makai lemai sida ke deka diatur 25 Oktober enggau 8 November ti deka datai.

Nangkan nya, Uggah madahka diatu sida benung beratika kebuah bisi entara sida tu ke agi mengkang enggai mindah ari endur nya.

“Aku dipadahka bisi entara sida tu gawa ba kilang ke semak endur nya lalu bala anak sida mega besekula semak enggau endur nya.

“Kelimpah ari nya, penanggul ekonomi mega siti kebuah sida enggai mindah ari endur nya,” ku iya.

Taja pia ku Uggah, pendam ke alai sida ngentak diatu diempu SDNU lalu ukai endur ti manah alai diau tauka berumah begulai enggau bala anak ungkup timpuh ti lama.

“Nya alai aku ngarapka bala ketuai komuniti deka seruran berandau enggau sida nya ngambika sida berubah ati deka minta,” ku Uggah.

Ba lansa ke sama, Uggah ti mega nyadi Menteri Betanam Betupi Moden, Tanah Adat enggau Pemansang Kandang Menua minta komuniti dayak ke diau ba mengeri bejalaika sistem betanam betupi moden baka fertigasyen enggau hidroponik ba tanah besemak enggau genturung pendiau sida.

Ku iya, sistem dikena bejalaika pengawa nya enda begunaka tanah ti besai tauka mayuh pengereja dikena ngintu utai tanam nya.

“Sida ulih nanam mayuh utai tanam baka chabi, sayur rumah panjai tauka lia ti ngembuan mayuh peminta ba makit diatu.

“Sida ke indu mega ulih ngumpul asil lalu bejalaika pengawa industri cottage lalu nambahka penatai pemisi ruang bilik sida,” ku iya.

Kelimpah ari nya, Uggah madahka perintah udah merambu ngaga siti palan agro di Samarahan alai sida ke betanam betupi ulih nyuwa lot dikena betanam betupi.

Ku iya, sida ke rinduka pekara nya lalu deka nemu enggau pekara nya tau nanya ngagai Opis Betanam Betupi ke semak alai diau.

Berebak enggau nya mega, Tuai Rumah Adi madahka sida chukup puas ati ba pegai Uggah.

Ku Tuai Rumah Adi, Uggah siku ketuai ti nyamai enggau begulai lalu kiruhka pengelantang komuniti Dayak ba menua tu.

Suara Sarawak