SIBU: Sekretari Perintah Nengeri, Datuk Amar Jaul Samion enggau bini iya Datin Amar Evelyn Ritikos begulai enggau Sarakup Indu Dayak Sarawak (SIDS) ngintu Pengerami Gawai Dayak nengah chara baru tauka digital kena 1 Jun tu tadi.
Pengerami nya bela dipasuk kaban SIDS ari sekeda pampang di nengeri tu nyerumba Atur Mindah Betagang (PKP) ke dipadah Perintah Nengeri berengkah 1 Jun tu tadi nyentuk 14 June tu ila.
Pengerami Gawai Dayak ke diintu nengah chara digital nya nyadi palan endur sida bekunsi penemu bekaul enggau atur pengidup chara baru.
Nya alai, Jaul bisi bekunsika penemu pasal langgur perintah nengeri deka nentuka semua rayat Sarawak nerima vaksin manggai bulan Ogos tu.
“Aku meransang rayat Sarawak ngerejister diri nengah program vaksinasi sereta patut besabar nganti gintiri diri nerima vaksin,” ku iya maya ngintu pengerami nya.
Nangkan ke nya, Chairman SIDS Dato Ir. Alice Jawan madah mensia mayuh ulih mantu perintah ngurangka kes positif COVID-19 nengah chara nitihka SOP ke udah ditetap.
“Taja diri sebilik enggau kaban belayan nadai pulai enggau ngintu Gawai ba menua ketegal COVID-19 tang sida agi ulih mantupka pengelengau diri nengah pelasar media baka Zoom, Google Meet, Skype tauka Whatsapp,” ku iya.
Kelimpah ari nya, Alice ngelalau kaban SIDS seruran bejimat, guna sengkabung mua, nyaga pemeresi diri dikena mutuska pengerekai Covid-19.
Bela bisi enggau Gawai Dayak chara digital nya Mandal Presiden Kanan SDNU Datuk Stephen Mundaw, Tuai Kaunsil Adat Istiadat Sarawak Datu Ronnie Edward, Sapit Dekan Universiti Putra Malaysia (UPM) Profesor Dr Jayum Jawan, Tuai Pampang sereta kaban SIDS ari Sibu, Betong, Marudi, Samarahan enggau Chairman SDNU Kuching Thaddeus Ling Allu.
