Raban soldadu nyaup polis bejaga ba rumah panjai

SIBU: Raban Soldadu Malaysia (ATM) udah dianjung ngagai endur ditemu bisi kes positif Covid-19 ngambi nyaup polis matau rumah panjai ti diempang jalai ditu.
Penerang ri ATM ti enggai dibantaika nama madahka sida udah dianjung gawa ngagai kandang menua berengkah sehari tu.
Tang iya enda nemu penyampau tubuh dianjung gawa laban ATM nya dikuasa Infantri 9 Briged.
“Nitihka penerang, raban ATM deka dianjung gawa ba palan matau ba genap rumah ti udah diempang jalai.
“Pia mega, bisi raban ATM dianjung gawa ba endur jalai diempang (SJR) begulai enggau polis chara begintir,” terang iya.
Hari Dua tu tadi, Sapit Kepala Menteri ti mega Chairman Komiti Penyangga Penusah Nengeri (JPBN), Datuk Amar Douglas Uggah Embas madahka raban ATM deka mantu matau rumah panjai ti diempang ba Sibu.
Ku iya, atur tu dipejalai beduduk ari bisi sekeda rumah panjai rembus ari endur diempang ba Sibu, apin lama.
Nambahka nya, Ketuai Polis Pelilih Sibu, ACP Stanley Jonathan Ringgit ba sebengkah aum pemberita kena Hari Satu tu tadi madahka sekeda peranak rumah panjai belalai mindah nengah jalai babas.
Ku Stanley, naka tu bisi 48 buah rumah panjai di Bagi Menua Sibu udah diempang jalai.