ENGKILILI: Siru ke nasip ditapi raban tasah angus ba Rumah Peter Igoh, Mujan Skrang, Kaban Parlimen Lubok Antu, Roy Angau Gingkoi udah ngabas rumah panjai nya, kemari.

Roy madahka iya deka nganjung bantu ari sukut meresi enggau nyungkur taba rumah panjai dikena mantu peranak dia ngentak rumah panjai baru.

Nambah ke nya, Roy mega udah ngemata pengawa nyuaka bantu 28 dapur gas ari Parti Sa’ati Rayat Sarawak (SUPP) Pampang Engkilili betuai ke Chairman, Kuak Jack Seng ngagai raban tasah angus nya.

Nitih penerang, Rumah Mujan Skrang angus lengis urung pukul 3 lemai kena 31 March tu tadi.

Taja pia, nadai penusah bebadi nyawa diripotka ketegal penusah angus nya. – EDISI UKAS.