ARTIKEL

Raban ti putus pengawa dibantu KSC

Facebook
Twitter
LinkedIn
WhatsApp
Telegram

TUSUN DUA

Ba tusun keterubah, kitai udah ngenang pengeransing Kuching Skills College (KSC) nyeridi komuniti ngena teknologi dron enggau tuju narak ulah sayau ke rampa menua.

Sekali tu kitai deka ngenang inisiatif dipejalaika sida dikena mantu raban ke dituntung penusah tauka penanggul ke mangka pengelantang rama enggau penekul ari sukut penatai pemisi.

KSC naka ulih nguji mantu raban ti putus pengawa tauka kena buai kereja ketegal pangka pandemik COVID-19 ke ngerekai kandang dua taun sebedau tu.

Tuai Pegawai Eksekutif (CEO) KSC, Novert Sullang Datuk Douglas Sullang madah, inisiatif mantu raban diselinting nya suba udah dipujur nengah kerejasama Serakup Pengelikun Pengereja (PERKESO).

Ku iya, kolej sida udah diaku Pekerso bejalaika kus Certified Drones Operational Aerial Surveillance Proficient (CDOASP) di baruh Pelin Nyungkak Baru Ekonomi Menua (PENJANA) ungkup raban diselinting ba menua tu.

“Kus dipejalai nengah Program Insentif Ngambi Pengereja enggau Bantu Latih serak tu udah digulu tiga iku ke datai ari Bagi Menua Miri enggau ba Kuching ditu empu.

“Sida tiga tu nerima nasip ke sama tang kitai naka ulih mutarka sida nengah latih enggau peluang kereja ke bisi,” ku iya lebuh dirandau Suara Sarawak ngenang pasal pejalai program nya.

SERVIS TEKNOLOGI

Novert madah, kus lima hari berunggu berengkah ari 18 Januari nyin tadi lalu tembu kemari endang nyelinting pengereja ke napi penanggul pengudah kena buai kereja.

Kitai meretika penusah enggau penanggul ditapi sida ke nadai kereja lebih agi maya pandemik diatu, runding sida mega puntan berundingka chara ngulihka belanja, ku iya.

“Nya kebuah kami ba KSC ngena peluang ke bisi tu mantu enggau ngembing sida ngambi badu kapa-kapa agi begigaka pengawa udah tu.

“Kus ke digulu tu nyikap sida ngena penemu enggau pengelandik bekenaka dron ba mayuh bengkah industri ti begunaka servis teknologi baru tu.

“Kami bisi amat pengandal sida tiga tu ulih nambahka penemu baru, muka runding belajarka teknologi ngambi ulih besemekih ba makit kereja nipakka peminta pengudah COVID-19.

“Niat kami deka ke pengereja tu bisi pengelandik ke chukup ngambi sida tetangkupka peminta makit kereja ke manah agi enggau gaji besai.

“Sida nadai penangi agi diatu taja udah dibuai kereja laban nemu diri bisi pengelebih ba pengelandik baka nerebaika dron tu dikena ngisi pengawa puang dalam sektor bekaul.

“Tu nyengkaum pengawa nyaga pemeruan rampa menua dalam industri kampung enggau betanam betupi ngena teknologi pemadu baru baka udah diperansang Premier Sarawak, Datuk Patinggi Tan Sri Abang Johari Tun Openg ti keran mai menua ngalih ngagai ekonomi gadung,” terang Novert.

NAPI UBAH JEMAN

Kelimpah ari nyikap sida tiga nya ngena pengelandik teknologi baru, kus nya mega tau dikumbai kitai ulih meri peransang ngambi ulih angkat ngepunka pengidup baru pengudah napi penguji besai.

Novert madah, kitai sama nemu nadai penusah lebih besai ari dibuai kereja ke marit penusah bukai datai nating pengidup sempama baka udah aruk dipukung alung, udah labuh ditinggang ga lesung.

“Tu mih chara dikena kami nulung sida ke nadai daya enggau abis kira tu ngambi bisi ati ransing enggau pengandal ngagai diri empu ngepunka pengidup baru.

“Meri sida pengarap, muka runding merening jauh ke mua laban pejalai idup sida agi jauh, dunya teknologi tu nadai pengujung, semampai bisi peminta,” ku iya nibarka jaku peransang.

Ngenang pasal pemesai pengulih teknologi baru nya, Novert madah, nyau deka semua industri diatu manggaika operasyen sida ba dron nyengkaum raban ari opis pengerai, bomba, soldadu enggau sektor bukai.

“Pengawa nyaga pemeruan rampa menua enggau kampung galau baka dipejalaika Opis Kampung Sarawak (JHS) enggau Ejensi Kampung Sarawak (SFC) mega begunaka teknologi dron tu.

“Maya pandemik ngerekai kandang dua taun suba, teknologi dron berega amat ngagai serikat ti begunaka teknologi nya bejalaika pengawa sida nyengkaum matau menua.

“Serikat majak bepanggai ba teknologi baru lebuh nelebaka diri gawa ngena chara baru sereta nambahka penyikar sida ngereja pengawa.

“Teknologi tu udah bisi ditu, pengereja landik mega udah dilatih.

Ari nya kitai tau dikumbai udah sedia napi ubah ba Revolusyen Industri 4.0 (IR 4.0) enggau ubah klimet dunya.

“Kitai nadai pilih bukai kelimpah ari nitih ke singkang pemansang dunya, nelebaka diri ngambi ulih maju baka menua maju bukai lalu juluk nyadi menua maju manggai taun 2030 deka ulih dijapai.

“Pengereja berubah, runding mega deka berubah nipakka peminta segang dunya mansang,” ku Novert madah enggau nyemetak.

PELUANG KEREJA BARU

Ke penerang, sida tiga ke nerima latih nya Axavier Evans Valentine Limang ari Kuching seraya Corinthians Tom Malaysia enggau Kelly Entap bela datai ari Miri.

Alvin Chai, siku pematih ke ngembuan mayuh peneleba ba kus nya enggau diaku ba Tanah Kenyalang ditu udah dilempaika tanggungpengawa matih sida tiga nya.

Sida tiga mega bisi diberi elaun sekumbang ke ngulu kus lima hari berunggu ke diatur ba KSC ditu dikena palan pelajar nya ngaku pengawa sida mutarka penanggul diri.

Mayuh penemu sentang teknologi dikunsi enggau bala penyereta kelimpah ari sanding penemu pasal pengawa puang ke bisi disedia ba sektor bekaul.

Nambah ke nya, pemesai guna teknologi dron ba pengawa nyaga rampa menua gadung kelimpah ulih nambahka produktiviti enggau ngurangka kos mega bisi dipelajar.

Ku Novert, nya setipak enggau juluk menua Sarawak ke benung merambu negapka pengawa bekenaka teknologi dron nyadi kereban nyidi pemansut hidrogen ba kandang kampung kayu bakau.

“Inovasyen nya entara pekara ti deka diberi perati Perintah Sarawak nengah Opis Menteri Perambu Mengeri, Pengatur Tanah enggau Rampa Menua. “Aplikasyen khas ngaul dron tu kebendar dikemansangka menua Jipun lalu nyadi sebagi ari inovasyen ngambi dikunsi kitai begulai ungkup pemaik dudi hari

. “Ari sukut penerang, kitai bulih nengah dron baka stok karbon enggau ke pemadu besai, kitai ulih melabaka berapa isi karbon nya dalam proses bekaul pengawa ngatur karbon dipejalaika Perintah Nengeri tu.

“Lalu tu deka meri peluang kereja besai ngagai sida ke udah ngulu kus dron baka ti dipejalaika kitai kelebih agi ungkup sida ke putus kereja tu tadi,” ku Novert.

REBUT PELUANG

Ari pemujur pengawa sida tiga nya nerima latih pengelandik, dia KSC diatu majak ransing mai mensia mayuh baka bala pengereja ari sektor e-hailing baka Grab, Food Panda, Maxim enggau ke bukai ngambi program kus timpuh pandak enggau nadai bebayar ba pengawa Dron.

Setipikit diberi ngagai sida ke ngulu kus tu dikumbai Persijilan IDT (Australia) ditambah enggau Sijil Kemahiran Malaysia (SKM) Tahap 2 ke alai sida nya enda ibuh mansutka belanja sesen pen.

“Pengelandik diulih kita deka diaku perintah lalu deka diberi elaun khas kelimpah peluang kereja ba pengawa dron dijamin.

“Kebuah kami berani meri jamin peluang kereja tu bepelasar ke peminta makit kereja nya empu kelebih agi ba pengawa fotografi enggau videografi langit.

“Peluang kereja tu bisi dipinta ba serikat makit, media chelak kelimpah orang ke begunaka servis bekaul dikena ngaga iklan, dokumentari enggau projek kreatif bukai.

“Pia mega ba servis nganjung utai enggau logistik ke alai serikat bekaul ngpunka inisiatif bekenaka dron nganjung paket ngagai sekeda endur, mantu nambahka penyikar nganjung utai,” terang iya.

Nambah ke nya, pengawa ngaga kar enggau nyukat tanah baka diguna ba industri reta tanah, pemansang dipejalaika perintah, matau endur ke mar dilawa endang tebal agi ngena teknologi dron diatu.

Udah nya ba pengawa betanam betupi pintar, ku Novert, dron dikena matau utai tanam, dikena ngerachun enggau maja sereta pemansut ai chara efisien.

“Tubah peluang kereja ba industri berumah enggau matau projek ke alai dron mantu matau pejalai projek berumah enggau meri data visual ti beguna ngagai raban ke menggi tanggungpengawa.

“Nya alai, kus dron tu besai guna lalu mayuh peluang kereja ulih dirintis kitai enti bisi pengelandik enggau penemu ngena teknologi baru tu.

“Kita tau rejister ba www. kuchingskills.edu.my/ kerjayamadani enti bisi ati nyerungkai penemu pasal teknologi dron tu begulai enggau kami ba KSC,” ku Novert nyimpul tusun kedua.

BERITA LAIN

BERITA TERBARU

PBB China sokong Palestin anggotai PBB

BEIJING: China menyokong Palestin menjadi anggota baharu Pertubuhan Bangsa-Bangsa Bersatu (PBB) dan menyokong Majlis Keselamatan PBB (UNSC) mengambil tindakan berkenaan dengan secepat mungkin. Ini dinyatakan