TAJA umur agi biak, tang penanyi Iban asal ari menua Kapit, Ramles Walter chukup landik nengkebang leka lagu kelimpah ngembuan patah nyawa ti chukup manah.

Lagu dikeluar Ramles endang semampai ‘trending’ sereta suah nyadi buah randau mensia mayuh.

Ku Ramles, 24, pengerindu iya ba pengawa belagu ngerembai kenyau ari mit kelebih agi ba sekula sekondari.

“Pengerindu aku belagu nyumbuk kenyau ari mit lalu majak ngerembai ba sekula sekondari.

“Tambah mega, kami sebilik endang nyukung pengerindu aku tu sereta nadai penanggul nyema aku nyadi penanyi baka diatu.

“Sukung nya meh ti chukup beguna ngambi genap singkang pejalai aku ba dunya pemerindang tu mai pengaga ngagai kami sebilik,” ku Ramles ngepunka randau pasal pejalai iya ba industri muzik Dayak tu.

PERANSANG

Ngelansa pasal sapa ti nyadi peransang tauka dikumbai ‘idola’ ba dunya pemerindang tu, dia Ramles madah, iya minat meda Hael Husaini.

“Enti ditanya sapa idola aku ba dunya pemerindang, aku endang minat meda siku penanyi ari Semenanjung Malaysia, Hael Husaini.

“Kebuah pia laban aku rindu meda chara iya nengkebang lagu enggau muzik ti chukup nyelai lalu suah mandangka penyelai ba genap lagu ditengkebang iya.

“Ukai semina nya aja, genap lagu ditengkebang enggau disada iya ‘trending’ belama.

“Ari nya tadi, aku rindu meda personaliti enggau pengelebih iya kelimpah chara Hael mai diri ba dunya pemerindang pen chukup manah,” terang iya.

ASAM GARAM NYADI PENANYI

“Pemar sekumbang masuk dalam industri muzik Dayak tu endang mayuh tang lebuh nyadi penanyi tu, kitai enda ulih nyeliahka diri ari pejah bala peminat.

“Ba penemu aku, pejah ke manah tauka dikumbai kitai positif nya ulih nyadi peransang ngambi nyulut sereta bebendar agi ngemansangka dalam industri tu.

“Ba aku, enti kitai nerima pejah negatif, reti iya kitai bisi pengelemi lalu aku deka nguji ngaduka baru pengilap tauka pengelemi nya,” ku Ramles.

Nambahka nya, Ramles madahka apai indai enggau menyadi iya ti seruran nyukung pejalai iya ngelama tu.

Ku Ramles, apai indai enggau bala menyadi iya mih entara orang ti udah nyukung ba singkang keterubah iya masuk dalam industri muzik Dayak tu.

“Nuju kami sebilik ke udah nyukung pejalai aku ngelama tu, aku meri besai terima kasih laban semampai bisi enggau aku, nadai ngira maya tusah tauka senang.

“Kita meh nyadi pengering aku ngambi nyingkang jauh ari dalam industri muzik tu.

“Jaku ajar apai enggau indai sereta bala menyadi semampai dikeingat aku belama ngambi bebendar agi ngemansangka diri sebaka enggau penanyi bukai dalam dunya pemerindang tu.

“Nuju bala penanyi bukai, aku arapka kitai bela mansang enggau sama besaup ngangkatka industri muzik Dayak ngambi ulih dikelala baka industri muzik bukai.

“Nuju bala peminat, terima kasih laban udah rindu sereta nyukung lagu ti disadaka aku ngelama tu.

“Kita meruan dikeingat aku belama laban sukung kita besai reti ba aku sereta nyadika peransang ngambi mansutka enggau nyadaka lagu bukai ti dikerindu kita. Terima kasih semua!,” ku Ramles tuchum gaga.

KONSEP

Nampung baru randau, bujang Kapit nya madah, iya berasai temegah laban sukung ari diri sebilik enggau bala peminat majak nyumbuk.

“Semua pemujur ti udah dijapai aku ngelama tu endang berekat sukung semua.

“Tambah mega, pejalai aku ba dunya pemerindang tu lanchar lalu arapka mensia mayuh terus nyukung enggau nerima manah lagu dikeluar aku.

“Ba umur baka tu, kebendar agi mayuh pekara meseti dipelajar enggau diansah aku.

“Nya kebuah, diatu aku naka ulih nambahka penemu enggau pengelandik diri bekaul leka lagu, tiun enggau pekara bukai.

“Aku nengkebang leka lagu enggau muzik kediri empu. Nyelai tauka enda nya bepanggai ngagai pengerindu bala peninga.

“Tang Puji Tuhan, naka diatu lagu ditengkebang enggau disada aku endang dikerindu bala peminat magang.

“Kunchi teulihka pemujur ba genap pengawa dikereja kitai nya semampai belajar, ngansah bakat enggau anang mudah putus pengarap enggau alah laban penguji,” terang iya.

Ba penemu Ramles, iya nengkebang leka enggau tiun lagu nya nitih peminta rebak diatu kelimpah agi ngena konsep ti endang dikerindu bala peninga.

Ku iya, kebendar nadai bida laban enti nadai ke lama udah tentu nadai ke baru.

KEREJASAMA MAXIS

Nampung randau ke dalam agi, Ramles madahka diri berasai gagit enggau temegah pengudah nerima pesan ari raban Maxis.

“Asai enda pechaya, temegah enggau gagit. Nya meh pengasai ati diri pengudah nerima pesan ari raban Maxis.

“Terima kasih ngagai raban Maxis laban enda belampung ati milih aku bekerejasama enggau sida.

“Pengawa ngerikod muzik video semina dua hari aja lalu pengawa tu mujur berekat kerejasama semua tim.

“Nyau bekenang ke lagu Gawai, lagu Richah Gawai tu bekenangka pengerichah raban bansa Dayak ngintu hari besai kelai pengujung musim ngetau padi.

“Dalam lagu Richah Gawai nya mega bisi mandangka adat enggau main asal kitai Iban baka pengawa miring enggau bebiau.

“Nengah muzik video tu mega, orang luar majak ngelala penyelai adat, main asal enggau daya idup kitai.

“Ba aku, tu endang peluang besai nambahka peneleba diri sekumbang udah nyadi penanyi,” terang Ramles.

Ungkup penerang, video lagu Richah Gawai nya digaga Kayu Malam Productions ari Kuching enggau Bsync Live (KL).

RESIA PEMUJUR

Ngelansa pasal tips tauka resia nyadi penanyi, dia iya madah, kitai meseti bisi disiplin lalu anang mudah putus pengarap ba sebarang pengawa dikereja kitai.

Terang Ramles, genap pengawa dikereja kitai tu bisi pemanah enggau ngajar kitai ba pengidup.

“Anang sesekali mudah nyerah alah seagi enda tepantup ba bandir enggau datai baa dan ke dikedeka kitai.

“Sigi gaya, tiap singkang pejalai kitai endang bisi penguji ngambi kitai majak kering,” ku jaku peransang Ramles.

Ramles madah baru, ungkup nembiak ke deka ngaul diri ba dunya muzik, sida meseti narak ulah berani nguji enggau anang mudah putus pengarap ngambi ulih beretan lama ba industri muzik Dayak.

Iya mega ngandalka industri muzik Dayak di Sarawak terus maju enggau dikelala seikas industri muzik di Semenanjung Malaysia enggau tikas antarabansa.

“Nya alai, bala peminat ti deka meda berita baru ari aku, kita tau follow Facebook aku iya nya Tok Rams sereta Pages FANSCLUB iya nya Ramles Walter.

“Enti ba Instagram, kita ulih follow ba TOK_RAMS sereta page fans ba RAMFANS_FANCLUB seraya ba Youtube, kita ulih follow ba RAMLES WALTER CHANNEL.

“Enggau peluang tu, meri besai terima kasih ngagai Ruai Suara Sarawak laban udah ngerandau beserimbai Pengerami Gawai Dayak enda lama da agi.

“Meri Selamat Ngintu Pengerami Gawai Dayak nuju semua, besampika taun tu bulih tuah, bulih limpah lebih ari taun ke udah.

“Pia mega, besampika semua kitai bulih pengerai, pengelantang enggau penyenang. Oohaaa!

“Nuju bala peminat, anang leju nyukung lagu disadaka aku lalu kita mega tau meda berita baru ari aku ba Facebook, Instagram enggau Youtube ke udah dipadah tadi.

“Teruska sukung kita. Terima kasih semua!” ku Ramles nyimpul randau.