RESEPI daun bungkang enggau daun buan ti dipanduk Ramos Jalang anak Nyawai udah narit ati bala akim ba World Chef Championship 2023 ti diatur ba Johor empai lama.

Sekali agi Ramos udah ngemegah nama Sarawak kelebih agi nama Malaysia ba pengawa kulinari.

Pengerindu ba pengawa nyumai tauka dikumbai kulinari udah bebungai kenyau ari mit lalu enda kala padam nyentuk diatu.

Ari pengerindu mela pemakai nya, singkang Ramos majak jauh lalu udah datai ba tikas dunya.

Taja suah ngempu gelar champion ba bemacham pekit kulinari, bujang sigat ari Bintulu tu enda leju ngansah pengelandik kulinari masuk mayuh agi pekit lalu ngembing raban bukai.

NURAI SEJARAH

Empai lama, Ramos ke mega Presiden UTHM Gastromé Team (UGT) enggau anak Iban ari Sarawak udah mai nama organisasyen kulinari ti ditumbuh iya.

Pemujur pekit tu mega udah ngangkat kaban UTHM Gastromé Team (UGT) nyengkaum baka nembiak Universiti Tun Hussein Onn Malaysia (Johor).

Ba pekit nya, Ramos udah mai pulai lima midul pirak enggau lima setipikit antarabansa dalam lima kategori pekit kulinari ti bebida.

Semua tu berekat pemintar runding Ramos nengkebang resepi ti nyelai enggau jarang didinga.

Ba pekit dunya nya, Ramos udah ngena pemakai authentic ari Borneo baka daun bungkang, berau chelum Borneo, daun buan enggau ke bukai.

“Bala akim profesional temegah sereta alit ati meda penyamai enggau penyelai pemakai ti dipanduk aku.

“Kenyau ari keterubah masuk pekit kulinari, aku ngembuan juluk ati deka ngangkat pemakai kitai Iban ngambi majak dikelala serata dunya.

“Kebuah pia laban pemakai kitai tu ukai semina nyamai tang ngembuan pemanah enggau penyelai iya empu,” ku Ramos tuchum.

Ari pemakai nya, iya udah ngaga lima resepi asal bebida tang ditempa chara moden nyadi pemakai Borneo Fine Dining.

PEKIT DUNYA

Berasai betuah ulih berandau sereta nanya lenak agi pasal pejalai pekit nya ti ditusui Ramos empu.

Mua Ramos tampak tepantup ati, gaga enggau temegah laban ulih nurai sejarah baru sereta mai bala bukai sama ngasai pemujur ba pekit kulinari dunya nya.

Ramos madah, World Chef Championship 2023 ti diatur ba Johor tu mungkur bemacham menua.

Tu nyengkaum menua Thailand, Indonesia, China, Hong Kong, Taiwan, Amerika Syarikat, Canada, Australia, India enggau ke bukai.

“Pekit tu dipasuk 1,498 iku chef ari serata dunya lalu ba pekit tu meh kami bela nguji nasip enggau pengelandik diri.

“Kami bepekit berengkah ari 18 ngagai 20 Mei 2023 ba Persada Johor International Convention Centre.

ENDA PULAI JARI PUANG

“Bisi tujuh iku nembiak enda nyengkaum aku empu di baruh UTHM Gastromé Team mujur mai pulai midul,” ku iya.

Entara nama kaban organisasyen UTHM Gastromé Team ti masuk Word Chef Championship 2023 iya nya Mentor ke mega Pengari Pengelicha ari UTHM, Afif Naim bin Abd enggau Presiden UTHM Gastromé Team, Ramos Jalang anak Nyawai ke mujur bulih lima midul pirak enggau lima setipikit antarabansa.

Bisi mega Mohammad Nur Ramadhan bin Mohd Nur Farhan ke mujur bulih dua midul pirak enggau dua setipikit antarabansa.

Seraya Nur Arina Aliah binti Hairil, Mohamad Azwan bin Jamil, Maqlies Enoglia Martirno, Nur Fitrah Liyana binti Mohamad Zin, Mohamad Irfan bin Nazri enggau Agnes Alice Johnny bela bulih siti midul pirak enggau siti setipikit antarabansa.

Nampung baru kenang, Ramos madah, iya benung nyikap diri nganjung pengari ngagai pekit dunya bukai ke deka diatur bulan September 2023.

“Juluk baka selama, deka ngangkat pemakai Borneo ngagai tikas dunya.

“Aku mega keran deka nyadi pengelicha ba institusyen pelajar ba kus kulinari, gastronomi ngambi ngembing nembiak ba dunya pemakai,” ku juluk ati Ramos.

Bekunsi penerang pasal pekit dunya nya, bisi 1,498 chef ari menua tu enggau menua luar ngambi bagi ba World Chef Championship Malaysia 2023.

Pekit tu diatur pengelama tiga hari ba Persada Johor International Convention Centre.

Pekit ti diatur kedua kali nya nyadi menalan bala chef bisi peneleba mantaika bakat sida ba kulinari.

CHEF DUNYA

Chairman Pengatur Pekit nya, Michael Ooi Beng Hock madah, pekit ba taun kedua nya diatur ngambi ngelaku sereta ngangkatka standard kulinari menua ba mata dunya.

Ku iya, juluk tu dikemujur nengah penyereta raban chef ari bemacham menua baka ari menua Thailand, Indonesia, China, Hong Kong, Taiwan, Amerika Syarikat, Kanada, Australia enggau India.

Michael madah, tu mega nyadi pelasar bekunsi bakat tikas dunya ba pengawa kulinari.

“Kami udah merambu pekit kedua kali nya berapa taun ke udah tang ditangguh ketegal pandemic COVID-19.

“Kami milih Johor nyadi tuai rumah nitihka sukung ari perintah nengeri kelimpah ulih matak mayuh agi penyereta ari menua luar.

“Bisi 19 pekit mungkur semilan kategori enggau 152 projek mujur diasil.

“Kami mega mai 40 chef betikas dunya ke deka mandangka chara sida nyendiaka pemakai,” terang iya.

Pekit nya udah dipenyadi Chairman Komiti Dagang Temuai, Rampa Menua, Pesaka enggau Budaya Nengeri, K. Raven Kumar.

Sama bisi datai Direktor Tourism Johor, Suhairi Hashim.

Michael madah, pekit nya nurai rikod pengawa manduk mi guring pemadu besai ditangkan penyampau projek kulinari pemadu mayuh sereta nerima penyereta pemadu mayuh ba pekit nya.

MATAK TEMUAI ANTARABANSA

Kelimpah ari nya, Raven Kumar madah, World Chef Championship Malaysia 2023 nya sebagi ari inisiatif perintah nengeri nengah Tourism Johor nentuka Johor nambah penyampau temuai dalam menua enggau antarabansa.

“Taun 2023 nya taun pemadu manah nyungkak dagang temuai laban kitai diatu udah ngalih ngagai renggat endemik.

“Kitai ulih meda industri dagang temuai di Johor udah suman enggau baka selama bisi penyampau pengusung mega nambah.

“Raban Tourism Johor mega udah bejalaika bemacham program dikena ngeranchakka agi industri dagang temuai ba nengeri tu.

“Tu nyengkaum bantu dagang temuai baka insentif ungkup pemain industri.

“Kitai mega ngatur pengerami besai baka ‘Nusantara Music and International Food Festival, Gegar Raya enggau ke bukai,” terang iya.