Rampa menua Lingga berubah dalam lima taun

LINGGA: Dalam timpuh lima taun berengkah taun baru nyentuk 2025, Linggai deka nyadi palan jalai besai kelimpah bisi pengulih ungkup pengawa betanam betupi moden.

Kepala Menteri Datuk Patinggi Abang Johari Tun Openg madah, Perintah Sarawak dipegai Gempung Parti Sarawak (GPS) komited ngubah rampa menua Lingga lebuh deka ngaga sekedai jalai enggau jematan baru.

“Dalam timpuh lima taun ke deka datai, berengkah taun 2020 nyentuk 2025 kitai deka ngaga jalai alun baru ari Lingga ngagai Betong lalu ngaga jalai alun ari Lingga-Sebuyau enggau ari Sebuyau terus ngagai Jematan Batang Lupar,” ku iya.

Abang Johari mansutka jaku nya lebuh bejadi Pengawa Nasih Tanah Projek Pemansang Tebing Sungai enggau Palan Servis Lingga di Pasar Lingga, ditu kemari.

“Nya alai, Lingga deka nyadi siti bah jalai besai lalu nerima empas positing ke alai tanah deka dikemansang dandang besai ungkup pengawa betanam betupi moden.

“Tu chara ke chukup pintar dikena nampung peminta pemakai rayat ba menua tu,” ku Abang Johari nyemetak madah.

Abang Johari mega madahka Sarawak diatu ngimport RM4.7 bilion pemakai ke alai sebagi besai dikena nyadi pemakai jelu ke ditupi.

“Pengawa nanam lingkaum entara ke ditemu ulih dikemansang ditu. Nya kebuah kandang menua Stumbin, Lingga nyentuk menua Simanggang deka diungkupka pengawa betanam betupi dandang besai nengah Program Tibang Pemakai Sarawak,” ku iya nerang silik.

Ku Abang Johari, Sarawak meseti belajar ari Singapore baka ni sebuah menua ke mimit tanah ngemansangka pengawa betanam betupi enti dibanding menua kitai tu ngembuan dandang tanah ke jauh besai ari menua nya.

Suara Sarawak