Randau Eksklusif : Mawan andal agi disukung rayat Pakan

Randau eksklusif Dr Jeniri Amir enggau Adun Pakan Tan Sri William Mawan Ikom ba program Twenty30 dipanchar terus nengah TVS, apin lama.

Dr Jeniri : Aku udah lama nguji ngiga Tan Sri, tang Tan Sri selalu kiruh. Tiap maya aku telefon Tan Sri suah diau ba Pakan nyau deka dua taun, nama perambu deka digaga Tan Sri lebuh ti ngusung urung 100 buah rumah panjai di Pakan?

Tan Sri Mawan : Nya endang amai. Udah dua taun lebih, kenyau 2016, aku nadai formula tauka falsafah dalam politik. Aku mesti ngusung rumah panjai meda peragam runding mensia mayuh. Nama pekara dikedeka sida. Semina chara aku ulih ngelala meda peminta sida.

Tan Sri ngusung rumah panjai ninting minggu?

Kira dua kali seminggu lalu mayuh peranak udah nemu aku nadai mayuh pengawa dikereja, nyadi nya pengawa ti digaga aku enggau naka ulih.

Nama pekara ti ngasuh Tan Sri terus mansang ke mua?

Semangat aku gawa endang meruan bisi. Kebendar pengawa agi mayuh patut diadu tang agih enggi aku ari perintah chukup mimit baka Projek Mit Menua Pesisir (MRP). Nyadi, enda mayuh pekara ulih diperunding enti dibanding enggau pekara dipinta rayat.

Sekumbang Tan Sri udah bejalai ngelawa rumah panjai. Kati Tan Sri agi andal diri ulih menang ba PRN deka datai?

Mensia mayuh lebih nemu nama pengawa ti udah digaga aku. Tang lebuh ngenang penyikap diri bekaul ngetanka penuduk ti mar tu. Aku ngasaika diri udah sedia. Taja pia, pemutus nya ukai ba jari aku.

Aku agi ingatka jaku Tan Sri madah munyi tu ‘nyema bos ngasuh aku terejun, aku deka nanya ari tingkat ni?’. Tan Sri agi bepanggai ba jaku nya?

Aku ngaluska agi, nyema bos aku nanya Mawan nuan terejun ari begunan nya, aku deka nanya baru ari tingkat ni tuan? Reti nya sama, tetap deka mati. Tikas penaluk nya sama. Enda ibuh endur nuan nanya baru nama kebuah.

Nitihka pekara ti digaga Tan Sri dalam timpuh dua taun tu, terang mandangka Tan Sri bedau sedia ngelepaska penuduk Dun Pakan lalu Tan Sri agi besedia deka betanding? Gaya Tan Sri tu baka ke bedau sedia deka terejun ari begunan. Baka ni nya?

Kitai mesti bisi pilih ungkup diri empu enggau ngaga pilih nya. Nama pekara ti patut diadu enggau bantu ngagai rayat, ukai ungkup diri empu. Bos tetap bos. Bos deka nentuka nama pekara ti patut dikena negapka iya enggau nentuka proses, raban enggau perambu ti patut digaga ngagai rayat. Enti aku ngelaban proses nya, aku patut diiar. Tang, nyema aku agi nyukung meri reti aku enda ibuh ‘terejun ari begunan’, Tang, nyema pekara nya ulih mutarka penanggul, aku sanggup terejun.

Beratika pengaw ke udah digaga Tan Sri diatu, Tan Sri baka andal bos sigi enda ngasuh Tan Sri terejun?

Diatu aku pechaya enggau diri empu lalu ngembuan sukung ti manah. Ukai semina ngagai aku aja, tang mega ngagai perintah enggau parti di diarika aku.

Taja pia, ba PRN 2016, majoriti Tan Sri semina 426 undi aja. Baka ni nya?

Nya kebendar, orang ti dikumbai bakih enggau tim enda beamat nyukung sereta bemain aja. Maya nya aku bedau tegap. Pia mega, maya nya aku nadai ngarika sebarang parti politik.

Bekaul enggau Tan Sri ke deka betanding baru ba PRN deka datai, baka ni Tan Sri ulih nambahka sukung rayat?

Ari perati agi mayuh rayat rinduka aku. Nya alai aku chukup udah sedia. Aku pechaya sida (rayat) tetap nyukung.

Bisi pansik madahka Pakan pelilih menua pemadu seranta dalam Sarawak. Nama timbal Tan Sri?

Nitihka Banchi Ekonomi 2016, Pakan tebilang enggau pengeluar asil lada. Bisi 17,000 hektar kebun lada di dalam menua, ari penyampau nya 16,000 hektar ari Sarawak laluh ke bukai ari Sabah enggau Johor. Pakan mungkur 2,000 hektar kebun lada ngaul 3,490 metrik tan lada beungkus RM109 juta. Pakan ngembuan penyampau rayat 17,000 iku, ari penyampau tu, 5,800 iku orang bekaul enggau pengawa nanam lada mungkur asil penatai pemisi penyampau RM105 juta. Kati tau bisi orang ngumbai pelilih menua tu pemadu seranta?

Pakan udah ngembuan 97 peratus bekal kuasa karan, 97 peratus datai jalai alun enggau 62 peratus bekal ai sereta mayuh agi projek bukai deka dipejalai ba selampur menua nya. Tu bedau nyengkaum asil tanam bukai baka sawit enggau getah. Ukai semina nya aja, nadai rumah panjai di Pakan bisi repuk. Semua rumah panjai di Pakan udah besemin. Sida ti ngumbai Pakan pelilih pemadu seranta di Malaysia, aku ngasaika tuduh nya udah kelalu.

Semua nya enda betul. Aku enda nemu ari ni sida tau nyimpul penemu ke baka? Aku mega enda ngemanjaika pekara tu laban aku nadai peneleba ba bidang antropologi tauka ekonomi, tang aku ngelaluka sida empu datai ke Pakan.

Raban profesional ti deka ke Pakan, kita empu tau meda. Aku sanggup mayar bil pejalai sida. Awakka sida empu datai meratika pekara nya. Aku enda bulih penguntung ari pekara tu tang sida enda patut meri tuduh ke baka nya.

Orang luar suah nyebut Pakan pemadu seranta enggau jauh, tang kebendar Pakan bepalan ba tengah mengeri, semina 30 minit pejalai ari Sarikei enti jalai alun udah meruan.

Nama pugu runding Tan Sri dalam politik?

Keterubah, nya bekaul enggau diri empu tauka sadang ekonomi kitai, tang pekara nya mega ngaul orang bukai. Ba aku, politik baka orang tama nadai pemendar ngagai pengidup nuan, ungkup guna diri empu. Nuan ulih muai tang enti enda ulih, anang muai iya.

Tan Sri kala nyadi Presiden Parti Demokratik Progesif Sarawak (SPDP) enggau kala nyadi Presiden Parti Tenaga Sarawak (Teras), diatu Tan Sri nyadi siku Adun aja. Enti dikenang baru, Tan Sri bisi nesal laban penyilap politik tu?

Ba runding aku nya ukai penyilap. Aku tama ketegal politik lalu lebuh ba Parti Nasional Sarawak (SNAP) maya raban profesional Dayak ninggalka parti nya laban bisi kebuah ba sida empu. Maya raban ke pansut, aku nguluka raban Dayak profesional tama ngagai parti tu. Tang maya nya mega, gaya parti enda ulih manah. Bisi sekeda pengurang enggau jaku kami enda dipending.

Nya kebuah, aku enggau sekeda raban profesional bukai ninggalka SNAP lalu numbuhka parti baru dikumbai Parti Demokratik Progresif Sarawak (SPDP). Udah nya, kami nemu penanggul ke sama jauh tepawah ari tuju asal. Taja penanggul nya udah diputar ketuai tinggi Perintah Barisan Nasional (BN) maya nya, bisi agi orang bukai deka ngachau ti ngujungka aku nyerah.

Nama tangkan politik Tan Sri ari semua pekara ti nyadi tu?

Tegapka diri empu tauka tim, kitai begunaka pengering sereta anang mantul. Kitai mega mesti bisi runding, tuju, raban, visyen enggau chara bejalaika pengawa. Nyema kitai bisi duit, tang enti enda nemu negapka diri dalam parti, nya tau ngasuh kitai labuh.

Politik bisi maya ba baruh enggau ba atas. Ba bidang tu, runding enggau isu politik seruran berubah. Orang ke tuai deka muka peluang ngagai orang biak lalu udah nya kitai empu deka meda bemacham pekara ulih nyadi.

Nama kebuah Tan Sri milih PBB? Ukai parti bukai?

Pilih nya udah nyata. Sida ti ngelala aku maya enggau SNAP sereta numbuhka SPDP enggau Teras, sida nemu PBB deka dipilih aku. Baka ni aku nyukung parti, pekara nya enda kala tepawah ari peragam begulai enggau PBB.

Lebuh enggau PBB diatu, aku ngasai diri nyamai, mayuh bakih enggau baka sebuah rumah ti endang dikedeka aku. Beratika pekara tu, aku ulih ngatur sekeda pekara nitihka chara PBB.

Naka tu, urung 6,000 kaban PBB ba sitak aku udah ngerejista diri lalu urung 200 pom agi ba opis aku. Tu dikereja aku diatu mai rebak baru masuk PBB.

Ngelansa pasal Tanah Adat Bansa Asal (NCR), bemacham tuduh ngagai Perintah Sarawak. Nama penemu Tan Sri sentang pekara tu?

Isu tanah siti isu ke muntang dikelikuh orang politik. Ambika chunto, ngadu gazet Seksyen 6 dikumbai perintah deka ngerampas tanah rayat. Lebuh pekara nya ayan ba media rama, tusah kitai mantah laban penerang nya datai ari mayuh orang. Nyadi, aku ngasaika nadai jalai bukai kelimpah rayat empu mesti arapka perintah. Mayuh tanah ke udah disukat kelinggi udah diberi surat pala tanah.

Nama lalau Tan Sri ngagai orang ti ngempu tanah?

Sebedau nyukat tanah kita, berunding laban ungkus nyukat tanah tu besai. Nya alai, kitai benasip laban Perintah Besai enggau Perintah Sarawak udah ngagihka belanja dikena nyukat perimeter tanah NCR. Nyema kitai enda setuju tanah disukat, kita deka lenyau peluang nya.

Ba perati Tan Sri, nama pemar besai ti ditapi komuniti Iban diatu?

Pengidup Iban diatu jauh udah maju lebih agi ba pekara pelajar. Suba, kami bisi sistem pekara rama kediri ti bepanggai ba adat sereta ulah bujang berani. Pengudah bisi sekula, mayuh Iban bepelajar enggau penemu.

Nama pengandal Tan Sri ngagai komuniti Iban?

Kitai mesti bekerejasama enggau meri sukung ngagai perintah. Perintah merasang kitai mesti bekerejasama enggau beserakup. Mayuh program diperambu perintah, tang kitai enda ulih ngereja pengawa nya nengali.

Mayuh ejensi perintah ulih mantu, pia mega aku meransang peranak Pakan ke udah teulihka pemujur tau pulai ke Pakan besaup ngatur pemansang ba pelilih tu. Tu maya kitai bekerejasama begulai enggau perintah. Semina nya aja ulih nyamin pemansang menua kitai.

-abis-

Mawan 1

BERANDAU… Dr Jeniri Amir (kiba) benung ngerandau Tan Sri William Mawan Ikom ba program Twenty30 dipanchar terus nengah TVS, apin lama.

Mawan 2 -3

Tan Sri William Mawan Ikom