Rangkah mensia jeman neolitik deka dipandang ba muzium baru

KUCHING: Pengawa mai pulai rangkah mensia ti ditemu ba Gua Niah ari Universiti Florida deka ngubah gaya pengidup mensia ba Asia Tengara.

Menteri Dagang Temuai, Seni enggau Main Asal Datuk Abdul Karim Rahman Hamzah madah, pekara tua siti cherita ke chukup narit ati ba sektor dagang temuai menua ke alai rangkah mensia ti ditemu idup ba jeman neolitik di Asia Tengara.

“Nya kebuah aku deka mai rangkah mensia ke beumur lebih 40, 000 taun nya dibai pulai ngagai Sarawak lalu dipandang ba Muzium Sarawak ke baru ila,”ku terang Karim.

Iya mansutka jaku nya rambau aum pemberita pengudah Pengawa Bejadi Randau Nembiak Dunya 2020 (GYF 2020) ba sebuah hotel, ditu pagi tadi.

Nambahka nya ku Karim, Perintah deka bekerejasama enggau dua buah palan pelajar tinggi ke kala bejalaika pansik ba rangkah mensia nya (Universiti Nevada enggau Universiti Florida) ngambi mai pulai lebih ari 100 tulang mensia nya.

“Lebuh tulang nya ditemu, kitai nadai kereban ke moden ngambi ulih bejalaika pansik.

“Diatu menua kitai bisi kereban enggau palan pelajar tinggi kediri empu, nya kebuah kitai deka mai pulai rangkah mensia nya.

“Rangkah mensia nya ngembuan besai reti laban ditemu ba lubang batu kitai empu,” tandu iya.

Kelimpah ari nya, Karim madahka atur mai pulai rangkah mensia nya deka dipejalai bulan March tu.

Suara Sarawak