Rapas: Singkang terubah Adens

NAMA Adens engka bedau entu tampak ba industri muzik Dayak menua tu.

Taja pia, nadai sapa nemua dudi hari nama tu deka angkat pegari sereta dikerindu mensia mayuh sereta nyadika buah kenang orang ti rinduka patah nyawa iya.

Adens tauka nama amat iya Mahidin Abang Sulaiman asal ari Kampung Spaoh di Betong.

Bansa Melayu tang iya ngeringka ati diri nguji nasip ba industri muzik Dayak dibai ati keranka industri nya.

Manis agi laban enda lama agi album keterubah diberi nama Rapas deka ngerichahka agi industri muzik Iban lalu merindang sida ti rinduka lagu Iban ba menua tu.

KENANG MANIS… Adens nerima trofi ari Adun Layar, Gerald Rentap Jabu ba sebengkah pengerami.

Lagu benama Rapas ti diangkat nyadi nama album keterubah siti ari lima lagu dalam album kompilasyen asil tengkebang komposer Samuel Bayang.

“Album keterubah Adens benama Rapas tu deka ngundan lima buah lagu disadang deka dikeluar dalam bulan Oktober tu.

“Semua lagu dalam album tu ditengkebang komposer Samuel Bayang,” ku Adens.

Adens madahka album tu datai ba renggat kepenudi tengkebang lalu iya ngarapka sida ti rinduka muzik Iban menua tu deka meri sukung ngagai album Rapas maya iya dijual Oktober ila.

Ngelansa pasal album keterubah nya ku Adens, lagu ngemai rentak pop balada enggau muzik ranchak dangdut.

“Aku meri terima kasih ngagai sida ti udah bebendar gawa ngemujurka album Rapas tu.

“Aku mega ngarap nengah album tu deka nyadika singkang keterubah aku nyadi artis Iban ti dikelala enggau dikerindu.

“Beli mih album ti asal lalu ukai chelak tiru,” ku iya nyimpul randau.