ARTIKEL

Rayat Batang Lemanak udah kelalu lama randaka jalai alun meruan

Facebook
Twitter
LinkedIn
WhatsApp
Telegram

LUBOK ANTU: Peranak Batang Lemanak balat sebana sereta napi pemar betengahka Jalai Batang Sebeliau-Bilararap ti balat jai kelebih agi lebuh musin landas diatu.

Kaunsilor sitak Batang Lemanak, Wiliam Paong Langas madah, nya endang jalai ti ditengah peranak dia besehari-sehari baka beranjungka bala anak nurun ke sekula, nurun ke pasar bebeli barang, ngadu pengawa ba opis perintah, nurun ke kebun enggau ti bukai.

Iya madah, ba taun 2022, jalai nya kala dianchau batu ba sekeda endur tang bisi sekeda endur ti landai tauka enda tentu landai nadai dianchau batu.

“Nya kebuah, lebuh musin landas, jalai ti nadai dianchau batu nya tebal agi luchak sereta pedis ditengah entukar.

“Entara Jalai Batang Sebeliau-Bilararap ti balat jai baka jalai ti enda jauh ari simpang Meruteh, simpang Berenggang enggau simpang Telinting.

“Lebih ngenyinuka ati, bisi sekeda peranak ditu nyau bemalam ba rantau jalai ketegal entukar sida lap lebuh betengahka jalai ti luchak ba entara Rumah Panjai Bilararap enggau Tinting Berunai.

“Peranak Rumah Panjai Bangai enggau Ulu Skrang diatu bela betengahka jalai tu laban jematan Bangai enggau jematan Balong udah runtuh empai lama sereta enda ulih ditengah entukar agi.

“Kami balat irau ati ke pengelikun diri empu lebuh betengahka jalai tu.

“Nya alai, kami peranak ditu besai amat pengandal ati ngagai perintah ngambi melakin meruan jalai tu tauka abis nadai dianchau batu,” ku iya nyemetak.

Nangkan nya, Tuai Rumah Thomas Ringkai, Bangai bela ngelalau perintah mending sereta betatika sebana rayat dia ti betengahka jalai ti jai sereta mar nya.

Ku iya, perintah patut mutar penanggul nya lengkas laban udah lama rayat ditu randaka jalai alun ti meruan.

“Urung 30 buah rumah panjai ba Batang Lemanak enggau Ulu Skrang, tiga buah sekula enggau dua buah klinik bela betengahka jalai tu,” terang iya.

Pia mega, Tuai Rumah Sain Umpeng, Karangan Paoh ti ngarika 17 iku tuai rumah ba Batang Lemanak ngelempai pengandal ati ti besai ngagai Perintah Sarawak ti betuai ke Premier Sarawak, Datuk Patinggi Tan Sri Abang Johari Tun Openg ngambi mending lalu mutar sebana rayat ba Batang Lemanak enggau Ulu Skrang ditu.

Iya nyemetak madah, Sarawak ngembuan penatai pemisi besai, nya alai, kena meh nya ngemansangka infrastruktur pemun rayat ba menua ulu kelebih agi ba Batang Lemanak ditu.

“Kami endang ari kelia randaka pemansang infrastruktur pemun baka jalai alun ti meruan enggau bekal ai beresi ba menua kami ditu,” ku iya.

Tuai Rumah Anding Embik, Nanga Telinting mega bela ngelalau perintah enggau ejensi perintah bekaul mutar lengkas penanggul ti udah lama ditapi peranak dia sereta meri jalai alun ti meruan.

“Enti perintah enda ulih ngerumban pengawa melakin Jalai Batang Sebeliau-Bilararap, abis nadai perintah patut nganchauka dulu batu ba jalai tu ungkup pemaik peranak ditu.

“Perintah enda tau enda betatika pemaik enggau pengelikun peranak ditu lalu pemadu begunaka kami udah lama randaka jalai alun ti meruan,” ku iya.

Berebak enggau nya, Sekretari Kaban Parlimen Lubok Antu, Zainie Aji ti ngarika Kaban Parlimen Lubok Antu, Roy Angau Gingkoi madah, empai lama (9 Januari) raban sida nyengkaum pegawai ari Opis Kereja Raya (JKR) Sri Aman, OIC Sri Aman sereta bala kunteriktor bisi datai ngabas jalai ti jai nya.

Ku iya, atur tumu dikena mutar penanggul nya ungkup diatu iya nya kunteriktor ti dipilih deka muai tanah ti luchak ba Jalai Sebeliau-Bilararap ngambi ulih ditengah entukar.

“Pia mega, sida deka ngaga parit sementara ngambi ai ujan enda betadu ba endur nya.

“Lebuh nerima ripot bekaul penanggul tu, YB Roy udah mantai pekara tu ngagai Komiti Penyah Penusah Bagi Menua Sri Aman ngambi diberi perati sereta diputar nitih pematut.

“Kebendar Jalai Batang Sebeliau-Bilararap tu diperambu dibelakin ngena agih belanja ari Opis Menteri Pemansang Menua Pesisir enggau Wilayah (KKLW).

“Tang tu begunaka sekeda timpuh dikena bejalaika pengawa ngatur tanah rayat ti dipansa jalai tu, nyukat jalai, ngaga pelin jalai enggau ti bukai lalu tu deka berengkah dipejalai ba bulan Februari tu,” terang iya.

TR THOMAS RINGKAI
TR SAIN UMPENG
TR ANDING EMBIK
DINGAKA SEBANA KAMI… Sekeda jalai ti balat jai sereta luchak ba Jalai Batang Sebeliau-Bilararap meseti diputar meruan.

LAIN-LAIN BERITA

Lenyau mentor ti bepenau

KUCHING: Penau Tun Pehin Sri Abdul Taib Mahmud enggau bisi runding strategik mujur mai pemansang moden ngagai Sarawak. Menteri Industri Pemakai, Komoditi enggau Pemansang Wilayah

Projek ART Johor bechuntoka pemujur Sarawak

KUCHING: Sistem Transit Aliran Autonomi (ART) di Sarawak deka nyadi malin ungkup projek ART ti deka dipejalai di nengeri Johor. Perintah Nengeri Johor benung ngelanggur

Sarawak ngulit dua hari

KUCHING: Perintah Sarawak ngemendarka timpuh ngulit selampur nengeri pengelama dua hari, belabuh sehari tu enggau pagila. Nambah ke nya, tambai mega digitang tengan tiang aja

BERITA TERBARU

Allahyarham Tun Taib, Arkitek Pemodenan

MIRI: Yang di-Pertua Negeri Tun Pehin Sri Abdul Taib Mahmud digambarkan sebagai seorang Arkitek Pemodenan kerana sepanjang perkhidmatannya sebagai Ketua Menteri, beliau berjaya mengangkat serta