KUCHING: Peranak rumah panjai dilalau seruran nanggam pemanah kaul enggau Gempung Parti Sarawak (GPS) ngambi sida ulih ngasaika agih belanja ari perintah nengah pengari rayat GPS.
Sapit Menteri Pelajar, Inovasyen Enggau Pemansang Bakat ti mega ADUN Simanggang, Datuk Francis Harden Hollis madah, ba pekara nya, rayat patut nyeliahka dulu laya politik ti nadai meri penguntung.
“Penyulut ti mujur dijapai kita diatu enda ulih dijapai enti nadai kerejasama ari semua peranak ba menua tu,” ku iya.
Harden mansutka jaku nya rambau Program Ngiling Bidai Gawai ba Rumah Ringgit Kampung Ibol ditu, kena 20 June tu tadi.
Kelimpah meri jaku lalau, iya mega bisi meri bantu bakul pemakai ngagai 10 penerima orang tuai ti rejister diri ba Palan Servis ADUN Simanggang.
Program nya diatur ngelaika pengujung pengerami Gawai Dayak ti diintu raban bansa Dayak ba Sarawak.
Sama datai, Penghulu Mingging, Penghulu Andar Suntai, Penghulu Leonard Libau Anol, Kaunsilor Wong Yii Hong, Kaunsilor Micheal Pillow Lachen, Kaunsilor Munan Angkau, Kaunsilor Belilie Ajah enggau Kaunsilor Magdeline Melayu.
