Rayat dipuji ngasika SOP

KUCHING: Rayat Sarawak diperati nitihka tagang enda neresa zon, ku Sapit Kepala Menteri Datuk Amar Douglas Uggah Embas.

“Mimit aja entukar peribit dipeda ba jalai raya taja semak musin Hari Raya enggau kemisi hari besai,” ku iya nengah sebengkah penerang pengudah ngabas Pengawa Ngempang Jalai Raya (SJR) di Engkilili enggau Balai Ringin, kemari.

Uggah ke mega Chairman Komiti Penyangga Penusah Nengeri Sarawak (JPBNS) bela madahka pengaga ati diri meda pengeransing pengawa bala polis, soldadu enggau Rela besaup ngemujurka SJR di sepanjai jalai besai Pan Borneo.

Ku iya, SJR nya beguna amat dikena mutuska pengerekai Covid-19 di nengeri tu.

“Kitai bela nemu pejalai entara zon peneka ati ulih ngujungka penyadi kes positif niki,” ku iya.

Kenu ku Uggah, Sarawak diatu agi mayuh zon mirah.

Nya alai, ku iya genap orang mesti nemu nyaga diri empu, diri sebilik enggau komuniti ari kena rampit Covid-19.

“Nengah chara bejalai ngagai sitak bukai lebih agi nyema ari zon merah, nyadi kitai patut nyaga sida ke diau ba endur bukai.

“Pia mega nyema kitai ba zon gadung, anang nganjung diri ngagai zon mirah,” ku iya.

Pemindah entara zon di Sarawak endang enda dikemendar enti nadai permit ari polis, berengkah 7 ngagai 17 Mei tu.

Taja pia, pengawa nya dikemendar ungkup servis beguna (ekonomi enggau industri), bejalaika pengawa perintah enggau emejensi (berubat, penusah rabat enggau ke bukai).

Suara Sarawak