KUCHING: Opis Gerempung Pengelikun Rama (Perkeso) Kapit bisi ngatur program begulai enggau Palan Servis Pengari Rayat Parlimen Kapit sereta Kunsil Nengeri (Dun) Katibas dikena mantaika penerang senentang Skim Pengelikun Rama Raban Pengintu Ruang Bilik (SKSSR) ngagai perayat ba rumah panjai.
Sebengkah penerang media ensanus madah, program nya nerima penatai Sekretari Politik ngagai Kaban Parlimen Kapit, Datuk Seri Alexander Nanta Linggi, Ambrose Abong Bugek, Adun Katibas, Lidam Assan, Tuai Rumah Edward Minggu Nyantau enggau Menijar Opis Perkeso Kapit, Jules Nalong.
Tuju program nya diatur dikena meri penerang ngagai Palan Servis Rayat bekaul program enggau skim pengelikun rama ti disediaka Perkeso nyengkaum Skim Pengelikun Rama Gawa Kediri (SKSPS) sereta SKSSR.
Berebak enggau nya, Palan Servis Rayat Parlimen Kapit nerima manah sereta muji pengawa Perkeso ti ngintu pengelikun rama semua rayat kelebih agi ba sitak Kapit.
Ba program nya, Ambrose madah, sida andal ngatur kerejasama enggau Perkeso ba pengawa meri mayuh agi penerang ngagai tuai raban bansa enggau komuniti ngelingi nya senentang pemaik ti bisi disediaka ejensi nya.
Ba program nya mega, pewaris niang Kacha Ungak ti mega laki iya empu, Paing Brain nerima pemaik ari program SKSSR nengah pemeri Kutak Perkeso Siru ari raban Perkeso.
