KUCHING: Belanja ti besai patut diagih ngagai menua pesisir enggau menua ulu ba Sarawak dikena bejalaika projek pemansang infrastruktur pemun.
Nya pengandal ati Adun Murum, Kennedy Chuk Pai Ugon ngagai Perintah Penyerakup nyerumba pengawa mantaika Bajet 2023 lusa (Hari Lima).
Ku iya, ambika chunto baka ba Dun Murum, sekeda pekara ti patut diperatika baka projek jalai menua pesisir enggau begunan pelajar ti ulih nyungkak pemansang ekonomi rama rayat dia.
“Projek tu nyengkaum pengawa nyeleti jalai batang ngagai sitak Jelalong, Tubau urung 88 kilometer (km) penyauh, Long Urun (30km), Lusong Laku (55km), Metalun (20km), Tegulang (10km), Long Lawen (15km) sereta Long Unan enggau Long Senap (35km).
“Pia mega, pengawa nyeleti sekula repuk ba Dun Murum baka Sekula Primari (SK) Kuala Kebulu, SK Bukit Balai, SK Long Urun enggau SK Lusong Laku ti balat repuk kelimpah nyeleti rumah panjai enggau genturung pendiau ditu,” ku iya lebuh dirandau Suara Sarawak.
Ungkup pekara pengerai ku iya, Dun nya begunaka belanja dikena nyeleti Klinik Tubau enggau Lusong Laku, Murum, numbuhka sepital baru ba BRS Sungai Asap sereta numbuhka klinik baru ba Long Urun, Metalun enggau Tegulang.
“Ari sukut pengelantang enggau pengelikun rayat, Dun Murum ngarapka pengawa numbuhka Balai Bomba enggau Penyah Penusah, balai polis enggau Ejensi Nagang Dadah Nasional (AADK) ti baru ba BRS Sungai Asap,” ku iya.
Pekara nya dikena ngedutka takah pemansang entara mengeri enggau menua pesisir ke pemaik rayat seriris enggau semangat Malaysia Madani lalu nadai rayat deka dikelaung.
