Rayat lantang nerima pemansang

SARATOK: Projek ngaga jematan beungkus setengah juta ba tiga pelilih menua ditu deka berengkah enda lama agi.

Kaban Parlimen (MP) Saratok Ali Biju madahka Projek Mit Pemansang Menua Pesisir (MRP) udah dikemendar nengah ejensi Sitak Pemansang Betanam Betupi Penuh (IADA).

“Projek udah ditinda ngena chara tebuka ti berengkah diatur pun bulan September 2019 tu tadi.

“IADA dilempaika tanggungpengawa matau projek nya laban jematan tu bisi besangkut enggau pengawa betanam betupi ba genturung pendiau nya,” ku iya.

Ali ke mega Kaban Kaunsil Nengeri (Adun) Krian mansutka jaku tu lebuh dirandau Suara Sarawak, kemari.

BERASAI LANTANG… Tuai Rumah Serudin Ason mantaika pengaga diri pengudah rumah panjai sida dipilih nerima projek pemansang.

Nangkan nya, siku ari tuai rumah ti bulih projek jematan iya nya Tuai Rumah Serudin ari Ulu Kabo Saratok madahka sida serumah benasip amat laban deka bulih mayuh penguntung ari projek nya enti udah tembu ila.

“Manggai 48 taun kami udah pindah kitu ari dampa iya nya dalam taun 1971 suba ke alai nembiak redak dipegai aku napi pemar nadai jalai ti meruan ngelawa rumah panjai kami.

“Penusah ditapi kami serumah maya ai bah ngelama tu deka teputar ari projek dipejalai perintah.

“Pengudah jematan tembu ila, kami enda badu agi berinanka barang pemakai enggau utai bukai ke diguna maya pulai ke rumah panjai laban entukar ulih paking ba mua rumah,” ku iya gaga.

Nitih ku penerang, kelimpah ari Rumah Serudin di Ulu Kabo, peranak Rumah Layang di Ibus Roban enggau Rumah Belaki di Sungai Engkabang ari Pelilih Saratok bela ampit ngasaika projek pemansang tu.

Dulu ari nya, Pemantu Khas MP Saratok, Glenn Anthony, Staf ari Opis IADA, Komiti Pengatur Pengawa Palan Servis Komuniti Saratok Laga Biju disempulang Tuai Rumah Serudin enggau bala bukai bisi limpang ngabas taba projek jematan nya di Ulu Kabo ditu ensanus.

 

DEKA DITUKAR… Jematan kayu ke diatu deka diganti enggau jematan ke baru nengah projek MRP.

 

MATAU… Glen ngarika Ali disempulang bala bukai ngabas taba projek jematan di Ulu Kabo ensanus.

Suara Sarawak