BARAM: Skim Bekal Kuasa Karan Menua Pesisir (RES) Baram Hilir ti beungkus RM16.65 juta udah tembu penuh kena 15 March 2023.
Ku Sapit Menteri Pengerai Mensia Mayuh, Pengawa Berumah enggau Perintah Lokal, Datuk Dr Penguang Manggil ba ruai Facebook, Projek RES Baram Hilir nya berengkah dipejalai kena 16 March 2020.
“Pakej tu mungkur pengawa nyambung bekal kuasa karan ngagai tujuh buah rumah panjai.
“Tu nyengkaum Rumah Mekal 13 pintu, Rumah Budin 24 pintu, Rumah Nawah 36 pintu, Rumah Frederick 20 pintu enggau Rumah George Ijus 77 pintu.
“Pia mega ba Rumah Assam 13 pintu enggau Rumah Ngelingkong 34 pintu,” ku iya.
Penguang mansutka jaku nya lebuh bejadi Projek RES Rumah Budin anak Sandai di Assam Paya Hilir.
ADUN Marudi nya mega udah ngemendar agih belanja penyampau RM15,000 ngagai Komiti Pemansang enggau Pengelikun Genturung Pendiau (JKKK) Rumah Budin.
Gerempung indu Rumah Budin mega ampit nerima agih belanja penyampau RM5,000.
Sama datai Pegawai Opis Pelilih Marudi, Belayong Pok, Chairman Kaunsil Pelilih Marudi, Kaunsilor Edward Mendai, pengari Sekretari Mendam Opis Menteri Utiliti enggau Telekomunikasyen Sarawak, Indera enggau Ahmad Shukri, pengari Sarawak Energy Berhad (SEB) Zayyani, Penghulu Alex, bala Tuai Rumah enggau bala bukai.
Udah nya, Penguang nampung pejalai bejadi Bekal Kuasa Karan di Rumah Glingkong, Sungai Teraja Baram.
“Terima kasih ke pemanah sambut kita serumah ba pengawa tu.
“Berasai gaga ulih datai lalu bejadika pengawa kitai baka sehari tu.
“Pengawa kitai tu ngayanka penyiru perintah ti naka ulih mantu rayat ba Sarawak nadai ngira sekali ke ba menua pesisir enggau menua ulu.
“Aku ngarapka semua peranak di Baram hilir anang pambar enggau semampai seati ungkup pemaik begulai,” terang iya.
