Rayat menua pesisir tubah begunaka pemansang – Harden

SIMANGGANG: Anang mudah kena ajum jaku bula ari parti penyakal ti enggaika pemansang dibai Perintah Sarawak ba menua pesisir kelebih agi peranak ba rumah panjai, ku Adun Simanggang Datuk Francis Harden Hollis.

Ku iya, peranak menua pesisir ti agi tubah begunaka pemansang ba menua sida patut berunding enggau manah sereta enda nitihka ati diri.

“Diatu, kerejasama majak bekurang beduduk ari penemu politik ti dibai sebengkah parti politik ba nengeri tu.

“Taja pia, komponen parti di baruh Gempung Parti Sarawak (GPS) seruran bekerejasama mai Sarawak mansang nyadi nengeri ti tegap sereta enda muntang dikemeli parti ari luar ti tebilang enggau mayuh macham chara dikena nusutka runding ka megai lalu ngatur pengeraja nengeri ti dipejalaika pemesai GPS,” ku iya.

Harden madah munyi nya lebuh bejaku ba Program Beripai Kimpin Pemeresi Siri ke-17 ti diatur Majlis Daerah Sri Aman (MDSA) enggau kerejasama JKKK Rumah Chau Sambau San Ugol ditu kenaka Hari Enam tu tadi.

Ku iya, Sarawak ngembuan empat parti komponen dalam GPS lau pemesai ba genap komponen nya udah masai sereta bisi tuju ti terang.

Berebak enggau nya, Harden ngingatka peranak rumah panjai ngambika beratika penyakit baka Rabies, Malaria enggau Denggi taja benung bebendar ngemunaska pengerekai igi penyakit Covid-19.

“Penyakit tu mega ulih mai penusah ngagai pengidup kitai lalu nya kebuah pemeresi rampa menua beguna bendar sereta mesti nyadi fokus genap iku kitai,” ku iya nerang.

Program nya sebagi ari chara piak opis kaunsil kandang menua (PBT) betemu enggau rayat seraya mantaika chara baru nengah ulah ti beresi sereta kerejasama lebuh menua dituntung pengerekai igi penyakit Covid-19.

Kelimpah meri empas ngagai pemanah rampa ba rumah panjai, program nya mega nerenak ulah kerejasama entara peranak rumah panjai sereta tradisi sida ngetanka ulah beserakup ti udah dipejalai kenyau ari kelia.

Ba program nya, Harden ngemendarka geran Projek Mit Menua Pesisir (MRP) beungkus RM5,000 ngagai JKKK Rumah Chau enggau RM3,000 ngagai Biro Indu rumah panjai nya.

Bela bisi datai Chairman Bagi Pemansang Komuniti MDSA Cr Waterkiller James Junit, Sapit Pegawai Pengatur MDSA Regina Giles Senin, Sapit Pegawai Pengerai Persekitaran MDSA Fiona Bunu Joseph Lepa, Pemancha Jegai Jawa enggau Penghulu Mingging Sigan.