SIBU: Chairman Parti Sa’ati Rayat Sarawak (SUPP) Pampang Dudong Wong Ching Yong madah, Atur Nagang Pejalai (PKP) ti diterit kena 18 March tu tadi engka deka dilanjar pengelama berapa minggu agi.
Ku iya, timpuh tu ulih dilanjar enti nyema rayat enda beratka pekara tu sereta enda nitihka Atur Nagang Pejalai ti dipejalai ba menua tu.
Taja pia, Wong ngarapka atur nagang pejalai tu deka abis kena 31 March tu.
“Tang, lebuh beratika penyampau pesakit ditukuka positif Covid-19 nambah berapa hari ke udah, aku pechayaka PKP tu deka abis kena 31 March tu.
“Aku ngarapka kes tu majak nurun enggau pengerekai igi penyakit tu ulih diketu enti mensia mayuh enda pansut ari rumah sereta nitihka atur PKP,” terang iya, ditu pagi tadi.
Wong madahka diri bisi keluar sekali sehari meli utai ti diguna baka pemakai enggau ubat sepanjai timpuh PKP tu.
Kena 18 March tu tadi ba hari keterubah PKP dipejalai, iya madah agi mayuh orang ngirup ba pak kupi.
“Taja pia, berapa hari tu bisi kurang mimit laban mensia mayuh udah nitihka atur PKP ditetapka perintah.
“Pagi kemari aku bisi bejalai ngagai Jalai Tuanku Osman ke alai nyauka semua pak kupi udah ditutup.
“Aku meda, pak kupi semina beoperasyen ngagai penguna ti ngudar pemakai dibai pulai,” ku iya.
“Atur Nagang Pejalai tu beguna amat dikena ngetuka pengerekai igi penyakit Covid-19 taja pekara tu ngeruga pengawa rayat besehari-sehari,” tandu Wong.
“Peranak Sibu mega nitihka atur PKP tu lalu dikearap Sibu deka beresi ari dirampit igi penyakit Covid-19 taja bisi sekeda pesakit ti positif Covid-19 tu diubat ba Sepital Sibu nya pesakit datai ari kandang menua bukai,” tandu iya.
Nangkan nya, Kaban Parlimen Lanang Alice Lau nangkan mensia mayuh diau ba rumah aja pengelama timpuh PKP tu lalu pansut enti bisi kebuah aja.
“Enti kita bisi pengawa deka diadu tauka bisi utai deka dibeli, jaga takah enggau orang bukai, suah agi masu jari ngena sabun abis nadai pengelama 20 sikin.
“Berindik ari nya, anang nabur tauka ngerembaika berita bula lalu sama nyaga pangan diri,” ku Alice nyemetak madah.
