LAWAS: Mensia mayuh di Sarawak dilalau meruan sepenemu nentu ke pemansang ba menua tu lanchar dipejalai.
Sapit Premier Sarawak, Datuk Amar Awang Tengah Ali Hasan madah, kerejasama entara semua orang nadai ngira jalai pengidup beguna amat dikena nempa pemansang ti nyengkaum mayuh pekara baka infrastruktur enggau modal mensia.
“Pemansang dipejalai ukai semina ari sukut infrastruktur baka jalai alun, jematan tauka utiliti tang mega pemansang modal mensia, batang tubuh enggau semangat.
“Nengah singkang kitai nuju pemansang, utai ti beguna amat nya kitai meseti bekerejasama enggau pangan diri nadai ngira bansa, jalai pengarap, budaya sereta adat.
“Enti kitai nyingkang ngagai tuju ti sebaka, insya-Allah utai ti diperambu ulih dikereja enggau manah,” ku iya.
Awang Tengah bejaku munyi nya nengah ripot berita Unit Komunikasyen Perintah Sarawak (Ukas) lebuh bejadi Pengawa Nyadung Bemacham Bubur Gerempung Raban Indu Sarawak (PPWS) sereta pemeri ngagai raban asnaf ari Tabung Baitulmal Sarawak di Arena Lumba Pelilih Lawas, ensanus.
Adun Bukit Sari nya madah, komuniti menua patut nyingkang seraris enggau Perintah Sarawak ba pengawa ngangkat pemansang, munas penyeranta sereta nyamin pengelantang pengidup.
Seraya nya, iya mega minta semua pengempu tanah ngereja tanah sida dikena nambah penatai pemisi lalu ngangkat tikas pengidup diri.
“Chara meri penyedar nya kitai empu ti ngepunka iya dulu,” ku iya.
Ba program nya, Awang Tengah bejadi pengawa nyadung bubur lambuk ngagai penyereta sereta nyuaka pemeri ngagai 10 iku asnaf.
Sama datai Kaban Parlimen Lawas Datuk Henry Sum Agong, Residen Bagi Menua Limbang Yunus Tambi, Pegawai Opis Pelilih Lawas Ladin Atok, Chairman PPWS Bagi Menua Limbang-Lawas Suriyah Jinin enggau Chairperson PPWS Pelilih Lawas Sahbah Sisa.
