KANOWIT: Sitak Dun Ngemah deka lenyau agih belanja pemansang RM7 juta setaun enti sema salah pilih maya Pengawa Bepilih Nengeri Ke-12 (PRN-12) tu.
Pia ku jaku dibantaika Tuai Nembiak PRS, Datuk Snowdan Lawan lebuh bejaku di Rumah Andrew Balun, Nanga Ngungun, apin lama ke udah.
Iya nemuai ngagai rumah panjai nya seraya mantu chalun GPS Dun Ngemah, Anyi Jana bekimpin maya PRN-12 tu.
Chalun GPS Dun Balai Ringin nya mega nerang ngagai mensia mayuh bekaul agih belanja RM5 juta nya belanja ari Program Transfomasyen Menua Pesisir (RTP) enggau RM2 juta nya belanja Projek Mit Pemansang Menua Pesisir (MRP) setaun deka diberi ngagai pengari rayat perintah.
“Enti kita salah pangkah, semua RM7 juta nya lenyau lalu kitai nadai ngasaika pemansang nengah agih belanja nya.
“Nya kebuah, beguna amat kita nyukung enggau ngundi Anyi ngambi agih belanja nya deka diasaika rayat Dun Ngemah,” ku Snowdan.
Iya mega ngenang pengilap rayat Ngemah suba lebuh ngundi penyakal ba taun 2006.
Beduduk ari nya, Snowdan dekaka rayat Dun Ngemah belajar ari pengilap nya ngambi pekara nya badu nyadi pengudah Anyi nukar Alexander Vincent sekali tu.
“Ingat baka kita ba Ngemah tu suba enda nerima sebarang agih belanja ari Perintah Sarawak pengelama lima taun.
“Anang sampai pisang bebuah dua kali, perunding manah pekara tu,” ku iya madah baru.
Snowdan madahka nya Anyi nya chalun ke betul diundi laban iya chalun perintah.
Iya mega pechayaka Anyi ulih mai mayuh agi pemansang ba Dun Ngemah enti sema diberi mandat maya PRN-12 tu.
“Anyi tu baka jematan entara rayat Ngemah enggau perintah.
“Aku mega andalka Anyi ulih nampung agenda pemansang ditu nengah politik pemansang ti dikemeran GPS,” ku Snowdan.
Nangkan nya, Snowdan minta semua pengundi ba Dun Ngemah ulih sampal ngundi kena 18 Disember tu sereta ngasuh Anyi menang.
Ba PRN-12 tu, Anyi deka disatup Dr. Joseph Jawa Kendawang ari PSB, Satu Anchom (PKR), Leo Bunsu (PBDSB) enggau Charlie Genam (PBK) bepadan lima penjuru.
