KUCHING: Parti Sarawak Bersatu (PSB) endang penyakal lalu GPS bisi hak ngelaban sida.
Kaban Nembiak PRS Engkelili Roy Gingkoi madahka penerang dipansutka Dr Johnical Rayong ngumbai Datuk Snowdan Lawan kelalu tinggi jaku bisi ati ngerampas penuduk Dun Engkilili ari iya ti nyadi penyadang.
Ku iya, mensia mayuh udah nemu PSB tu enda sebilik enggau Perintah Sarawak dipegai GPS.
Roy madah, udah terang PSB nyadi parti penyakal enggau enda ibuh diterang agi.
Nyadi parti megai perintah ku iya, udah nyadi tanggungpengawa GPS ngelaban Rayong ba pengawa bepilih deka datai enggau juluk enda tau enda menang.
“Nitihka pematut sida ke penyakal, Rayong enggau Dun Engkilili diatu timpang laban nadai belanja pemansang ari Perintah Sarawak.
“Iya mega enda ulih meri belanja ungkup projek RTP, MRP agi lalu rayat ke rugi,” ku iya.
Ku Roy nambah, pengundi mega sedarka pekara tu lalu ngalihka sukung ngagai GPS laban sida nemua perintah dipegai GPS aja ulih meri pemansang.
Endang ari asal penuduk Dun Engkelili diempu SUPP ti nyadi komponen parti GPS lalu kami deka meri sukung ngagai genap parti komponen, ku iya madah nyemetak.
Peranak Engkelili nya mega madahka sida endang ngelala sapa Rayong nya ke bendar.
Iya nyemetak madah, Rayong empu udah melakangka pengundi ti ngundi iya laban engkechit parti ari SUPP ngagai UPP ke diatu dikumbai PSB lalu tu balat ngasuh pengundi saru penemu sereta pambar.
“Utai dikereja Rayong deka ngasuh pengundi nyima sereta tau ngasuh iya enda dipebasa rayat di Engkilili agi,” ku iya.
